Primeiru-Ministru, Taur Matan Ruak, ohin, loron 5 fulan-abríl tinan 2021, lidera sorumutuk Komisaun Interministeriál ida ba Protesaun Sivíl no Dezastres Naturais, ne’ebé hala’o iha Palásiu Governu, iha Díli, ho objetivu atu koordena resposta ba impaktu husi inundasaun ne’ebé akontese iha semana-nia-rohan iha Díli no iha zona oin-oin país nian.

Sorumutuk ne’e ninia objetivu prinsipál maka atu halo pontu situasaun no analiza medida sira ne’ebé presiza atu rekupera estragus ne’ebé provoka husi inundasaun no apoiu ba populasaun afetada.

Inundasaun ne’ebé akontese iha zona oin-oin país nian provoka prejuízu materiál boot, provoka família atus ba atus lakon sira nia hela fatin, no pelumenus vítima 27 maka mate no na’in ualu seidauk hetan.

Iha Díli, daudaun ne’e hamutuk ema na’in 13 maka mate no rihun hitu resin lakon sira nia hela fatin, ne’ebé daudaun ne’e hela iha fatin 12 ne’ebé lokaliza iha sidade Díli laran.

Durante horiseik, autoridade sira mobiliza ona esforsu hodi fó abrigu no apoiu ai-han ba ema sira ne’ebé lakon sira nia uma no hahú intervensaun iha infraestrutura ho objetivu atu estabelese filafali mobilidade viária no fornesimentu enerjia elétrika ho seguransa, garante reparasaun ba sistema abastesimentu bee ne’ebé hetan estragus, no hala’o serbisu urjente sira atu hamoos drenajen sira, normalizasaun no hasai rai-henek sira husi mota sira.

Sekretaria Estadu Protesaun Sivíl sei funsiona hanesan sentru operasionál ba rekolla apoiu umanitáriu no Vise-Primeiru-Ministru no Ministru Obras Públikas apela mós ba kontributu husi entidade sira setór privadu nian ne’ebé iha mákina hodi apoia iha asaun limpeza.

Governu deside ona katak sei permite abertura no funsionamentu normál ba loja sira ne’ebé fa’an materiál konstrusaun hodi apoia populasaun ne’ebé presiza materiál konstrusaun ba sira nia hela fatin no destaka katak restaurante sira bele kontinua sira-nia atividade iha rejime sosa no lori ba uma (takeaway e delivery).

Primeiru-Ministru agradese ba kontribuisaun husi ema hotu ne’ebé partisipa iha resposta ba inundasaun sira, inklui organizasaun relijioza, parseiru dezenvolvimentu, organizasaun sosiedade sivíl no sidadaun sira ein jerál, no orienta ona membru sira husi Komisaun Interministeriál nian ba Protesaun Sivíl no Dezastres Naturais atu nune’e bele impulsiona medida apoiu ba populasaun afetada sira no asaun limpeza no levantamentu ba estragu sira iha infraestrutura, atu normaliza lalais mobilidade viária no sistema abastesimentu enerjia elétrika, bee moos no saneamentu.

Iha komunikadu, Primeiru-Ministru hato’o “solidariedade ba populasaun ne’ebé afeta no sentidas kondolénsias ba família vítima sira nian husi inundasaun boot ne’e” no garante katak “Governu sei halo esforsu tomak hodi tulun família sira ne’ebé afeta husi dezastre naturál ida-ne’e”.