Konsellu Ministrus hala’o sorumutuk iha Ministériu Finansas,  iha Dili, no, hahú sorumutuk ho análize ba aprezentasaun husi koordenadór sira Sentru Integradu Jestaun Krize (SIJK), kona-ba pontu situasaun epidemiolójika iha Timor-Leste. Daudaun ne’e rejista kazu esporádiku sira iha Oekuse no Covalima, propagasaun kazu sira iha Baukau, Vikeke no Lautein ho orijen husi ema sira ne’ebé mai husi Dili, molok impozisaun serka sanitária, no propagasaun maka’as liuhusi SARS-CoV-2 iha área oin-oin sidade Dili nian.

Haree ba evolusaun situasaun epidemiolójika iha Postu Administrativu Fatumea munisípiu Kovalima nian, Konsellu Ministrus aprova ona projetu Rezolusaun Governu nian ne’ebé revoga Rezolusaun Governu nu. 13/2021, loron 10 fulan-marsu, ne’ebé impoin Serka Sanitária ida iha Postu Administrativu Fatumea.