Primeiru-Ministru Taur Matan Ruak, sesta ohin, loron 19 fulan-marsu tinan 2021, iha Palasiu Governu, simu Diretór Sentru Integradu Jestaun Krize (SIJK), Brigadeiru Jenerál João Miranda “Aluk” ho ekipa Sala Situasaun, hodi buka hatene kona-ba progresu serbisu Sala Situasaun-Sentru Integradu Jestaun Krize nian iha ámbitu Estadu Emerjénsia ba dala XI ne’e, liuliu diskute oinsá mak buka solusaun ba impaktu sósiu-ekonómiku ne’ebé populasaun hasoru durante serka sanitária iha Kapitál Dili.

“Ohin enkontru ho Señór Primeiru-Ministru mai atualiza informasaun hahú hosi implementasaun Estadu emerjénsia ba dala XI mai to’o ohin loron, difikuldade saida mak ita hasoru, saida mak ita halo tiha ona, saida mak presija halo para hasoru situasaun KOVID ida ne’e. ida ne’e mak sai hanesan pontu ne’ebé mak lori ami mai hasoru señór Primeiru-Ministru. Impaktu ekonómiku ne’ebé mak afeita liu ba ita-nia nia komunidade, asuntu ida ne’e mak ko’alia, oinsá mak responde situasaun ida ne’e hodi minimiza difikuldades sira ne’e”, esplika Diretór SIJK ba imprensa sira hafoin reuniaun ho Xefe Governu.

Liután Eis Xefe Kaza Militar ne’e hateten, ho númeru kazu KOVID ne’ebé aumenta ba bebeik iha posibilidade serka sanitária iha Dili sei estende atu fó biban ba ekipa sentinela KOVID-19 hodi kontinua buka tuir kontaktu besik kazu tranzmisaun lokál hodi izola hodi evita labele iha tranzmisaun komunitária.

Kona-ba estudante sira hosi Munisípiu sira ne’ebé estudu iha Dili, ne’ebé daudaun ne’e enfrenta hela problema ekonomia, tanba efeitu hosi serka sanitária refere, Diretor SIJK subliña, Sala Situasaun hanoin ona atu fó oportunidade ba estudante sira ne’e bele fila ba ida-idak nia munisípiu, maibé importante tenke ba uluk ‘Swab Test; iha Laboratóriu, no wainhira rezultadu hatudu negativu Sala Situasaun bele autoriza husik hela Dili.