Sekretáriu Estadu ba Eletrisidade, Água no Urbanizasaun (SEEAU), Januário Pereira akompaña husi Sekretáriu Estadu Agrikultura no Arborikultura, Marcos da Cruz, Sekretáriu Estadu Politika Enerjetika, Avelino Coelho, Sekretáriu Estadu Meiu Ambiente no reflorestrasaun, Abilio Lima no prezidenti komisaun G iha Parlamentu Nasional ba asuntu infrastrutura, Pedro da Costa, halo inaugurasaun ba faze dauluk, projeitu Gás Seep Aliambata “Sistema Liña Distribuisaun 20 KV” iha Suku Afaloikai, sub-distritu Uatulari, Distritu Viqueque iha loron Tersa (20/4) liu ba.

Projeitu Gás Seep Aliambata ho valór orsamentu dólar amérika tokon $ 1.145.388 ne’e servisu hamutuk ho Banku Mundiál ne’ebé hahú iha Setembru 2009 tinan kotuk, atu bele fasilita populasaun iha área rurál sira hodi iha aksesu ba elektrisidade tuir programa Governu sentrál ne’ebé lidera husi Primeiru-Ministru Kay Rala Xanana Gusmão, liu husi Sekretáriu Estadu ba Elektrisidade, Água no Urbanizasaun.

“Inaugurasaun projetu Gás Seep Aliambata ne’e, hanesan faze ba dauluk ne’ebé Governu servisu hamutuk ho Banku Mundial hodi realiza projetu atu benefisia povu Uatulari ne’ebé iha problema elektrisidade ho jeradór ida ninia kapasidade 400 KVA ekivale 320 KW ho ninia liña transmisaun,”informa SE-EAU, Januário Pereira.

SEEAU, Januário Pereira hatutan, projetu Gás Seep Aliambata ho jeradór ida bele ona fó ahi ba uma kain 500 no bele ona mós kobre Uatulari tomak, maibé suku balun ne’ebé dook husi vila hanesan sucu Matahoi, Iralere, Lugasa, Bailakurata no Nunu Malau seidauk bele hetan tamba transmisaun liñas seidauk kobre to’o iha aldeias no Sucus hirak ne’e.

“Maske nune’e hanesan servidór povu no nasaun nian, ami nia obrigasaun mak oras ne’e mobiliza ona tekniku sira oinsá atu ba sukat no estabelese liña transmisaun atu populasaun hela iha fatin hirak ne’e bele hetan hotu asesu ba ahi hanesan mós komunidade sira ne’ebe hetan ona iha Uatulari vila”.