Membru Konsellu Ministrus nian teste negativu husi COVID-19
Prezidénsia Konsellu Ministrus
VIII Governu Konstitusionál
...........................................................................................................................
Loron 9 fulan-marsu tinan 2021
Komunikadu Imprensa
Membru Konsellu Ministrus nian teste negativu husi COVID-19
Hafoin sorumutuk Konsellu Ministrus nian horseik, loron 8 fulan-marsu tinan 2021, membru Governu sira hotu ho sira-nia ekipa téknika tuir teste SARS-Cov-2 nian. Rezultadu teste nee nian fó-sai ohin no membru Governu nian no tékniku sira hetan rezultadu negativu.
Autoridade saúde nian halao hela teste masál atubele identifika ema hirak neebé karik infetadu ona no satan atu virus nee labale nakdaet iha ita-nia komunidade nia leet.
Haree ba kazu SARS-COV-2 nian neebé daudaun nee deteta ona iha sidade Dili no haree katak iha posibilidade boot atu akontese situasaun tranzmisaun komunitária, Governu aprova ona, horseik, Rezolusaun Governu nian neebé impoin serka sanitária no konfinamentu domisiliáriu jerál ba populasaun neebé hela iha munisípiu ida-nee.
Timor-Leste dadaun nee iha períodu estadu emerjénsia ba da-11 no daudaun nee rejista kazu ativu Coronavirus nian hamutuk 48, husi totál infetadu 142 dezde pandemia nee mosu.
Ministru Prezidénsia Konsellu Ministrus no Portavós Governu Konstitusionál VIII nian, agradese serbisu ekipa saúde, seguransa nian no ema hotu neebé serbisu loron-loron hodi garante seguransa ba sidadaun sira no husu ba “populasaun sira atu hakmatek, labele pániku, hela metin iha uma bainhira la presiza atu sai no halo tuir nafatin medida preventiva sira, hanesan uza máskara, fase liman beibeik, mantein distánsia pelu menus metru ida no labele halibur malu. REMATA
