……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 2 fulan-marsu tinan 2021
Konsellu Ministru hala’o sorumutuk iha Palásiu Governu, iha Dili no, aprova ona projetu Dekretu Governu nian hamutuk haat, ne’ebé aprezenta husi Ministru Obras Públikas, Salvador Soares dos Reis Pires, kona-ba valór husi remunerasaun ba membru órgaun sosiál sira husi Empreza Públika sira hanesan Eletrisidade Timor-leste (EDTL, E.P.) no Bee Timor-Leste (BTL, E.P), no ba Institutu Públiku Autoridade Nasionál ba Eletrisidade (ANE, I.P) no Autoridade Nasionál ba Bee no Saneamentu (ANAS, I.P). Ho Dekretu Governu nian hirak ne’e, aprova ona mós valór sira husi seña prezensa nian ne’ebé membru Konsellu Administrasaun nian sira no membru Konsellu Fiskál nian sira iha direitu atu simu ba sira-nia partisipasaun iha sorumutuk órgaun empreza públika no institutu públiku sira ne’e nian. Valór hirak ne’ebé hetan ona aprovasaun ne’e sei bele sai alvu alterasaun nian, tuir aprovasaun ba rejime remuneratóriu oin mai, ne’ebé aplika ba administrasaun indireta Estadu nian.
Hetan ona mós aprovasaun maka projetu Dekretu Governu nian, ne’ebé aprezenta husi Primeiru Ministru, Taur Matan Ruak, kona-ba medida sira ba ezekusaun estadu emerjénsia, ne’ebé renova husi Dekretu Prezidente Repúblika n. 15/2021, iha loron 1 fulan-marsu, atu hatán ba pandemia COVID-19. Estadu emerjénsia, ne’ebé agora hetan renovasaun ne’e, abranje teritóriu nasionál tomak no vigora hahú husi oras 00.00, loron 4 fulan-marsu tinan 2021 to’o tuku 23.59 loron 2 fulan-abríl tinan 2021.
Nune’e, medida sira ne’ebé maka antes ne’e aprova ona no ezekuta to’o oras ne’e mantein iha jeneralidade, liuliu bandu ema atu hakat liu fronteira rai-maran ho objetivu atu hala’o tradisaun ka kostume no atu hetan asesu ba merkadu reguladu sira; obrigatoriedade atu sirkulasaun internasionál hotu-hotu halo deit liuhusi postu fronteira nian sira, ne’ebé bele taka tuir desizaun Ministru Interiór nian bainhira razaun seguransa ka saúde públika nian justifika; sujeisaun ema hotu ne’ebé hakarak tama ka sai husi teritóriu ba kontrolu sanitáriu, no impede atu halo sirkulasaun internasionál ba ema hotu ne’ebé aprezenta sintoma infesaun SARS-CoV-2 ka COVID-19 nian; impozisaun izolamentu prolifilátiku (kuarantena) ba ema hotu-hotu ne’ebé tama iha teritóriu nasionál; sujeisaun ema hotu-hotu ne’ebé diagnostikada hetan ona COVID-19 ba izolamentu terapéutiku.
Durante vijénsia diploma ida-ne’e nian, ema hotu ne’ebé hela iha Timor- Leste, tenke mantein distánsia, pelumenus, metru ida husi ema seluk ne’ebé ho nia la hela hamutuk iha uma ida, utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza; no fase liman bainhira hakarak tama ba estabelesimentu komersiál sira, industriál ka prestasaun servisu nian ka ba edifísiu sira iha ne’ebé servisu administrasaun públika nian funsiona.
Admite mós posibilidade atu suspende temporariamente prosesu ensinu no aprendizajem, iha rejime prezensiál, karik departementu Governu nian ne’ebé sai nu’udar responsavel ba saúde públika rekomenda nune’e, atubele hamenus risku tranzmisaun SARS-CoV-2 nian.
Dekretu Governu nian ne’e prevee katak familia sira husi pesoál sira husi misaun diplomátika sira ne’ebé akreditada iha Dili bele mós kumpre períodu izolamentu profilátiku iha fatin ne’ebé Ministériu Saúde maka sei hatudu ka iha sira-nia hela-fatin rasik.
Konsellu Ministru aprova mós projetu Rezolusaun Governu nian ne’ebé renova impozisaun serka sanitária iha munisípiu Kovalima, hodi nafatin bandu dezlokasaun entre munisípiu ida-ne’e no munisípiu sira-seluk, husi tuku 00.00 loron 4 fulan-marsu tinan 2021 no tuku 23.59 loron 2 fulan-abríl tinan 2021 nian. Ministru Interiór bele mós autoriza dezlokasaun ema ka merkadoria nian, bazeia ba razaun umanitária, protesaun saúde públika, seguransa públika ka interese públiku nian, no define iha kondisaun sira hanesan ne’ebé maka bele halo dezlokasaun sira-ne’e.
Ikusliu, Vise-Primeiru-Ministru no Ministru Planu no Ordenamentu, José Maria dos Reis, halo aprezentasaun ida kona-ba planeamentu no orsamentasaun kona-ba projetu foun sira ba tinan 2022 no kona-ba ezekusaun projetu ba tinan 2021 nian husi Fundu Infraestrutura nian. Aprezentasaun ne’e ninia objetivu prinsipál maka halo análize ba prosesu no ba mekanizmu preparasaun, submisaun no implementasaun nian sira husi projetu sira husi liña ministeriál sira ne’ebé atu ezekuta liuhusi Fundu Infraestrutura nian. REMATA