……………………………………………………………………………………………………………
Komunikadu Imprensa
Sorumutuk Estraordináriu Konsellu Ministrus nian iha loron 26 fulan-fevereiru tinan 2021
Konsellu Ministrus hala’o sorumutuk iha Palásiu Governu, iha Dili no, analiza ona aprezentasaun husi responsável sira husi Sala Situasaun, Sentru Integradu Jestaun Krize nian, kona-ba pontu situasaun husi Koronavirus foun iha Timor-Leste. Tuir dadus ne’ebé aprezenta, iha ámbitu teste masal ne’ebé realiza, halo ona rekolla amostra totál 2648, iha Bobonaru, Kovalima no iha Rejiaun Administrativa Espesiál Oekusi Ambenu (RAEOA), no husi númeru ida-ne’e iha hitu maka rezultadu hatudu pozitivu. Kazu hitu ida-ne’e detetadu iha postu administrativu Fatumean, Munisípiu Kovalima, no ho ida-ne’e rejista tranzmisaun lokál ba dala uluk. Haree katak bele deteta orijen surtu ne’e nian no la iha indísiu katak surtu ne’e espalla ona ba fatin seluk, la iha evidénsia kona-ba tranzmisaun komunitária. REMATA