Governadór Banco Central de Timor-Leste (BCTL), Sr. Abraão de Vasconselos, hatete katak BCTL akompaña hela notisia ne’ebé sirkula iha públiku kona-ba asesu ba konta Fundu Petrolíferu governu nian ne’ebé mak rai iha Federal Reserve Bank of New York. Nia hatete katak iha notisia balu ne’ebé propoin Banku Federal Reserve impede ona Governu Timor-Leste atu asesu ba konta Fundu Petrolíferu.

Sr. Vasconselos esklarese katak notisia ne’e kompletamente laiha base ba faktu ruma. BCTL hakarak klarifika katak konta ne’ebé iha Federal Reserve Bank of New York nu’udar fundu estadu Timor-Leste nian no rejistu hodi BCTL nia naran ne’ebé jere relasaun entre BCTL no Federal Reserve Bank of New York. Lei prevee ona katak Governu apenas iha konta ida deit iha BCTL. Bainhira de’it Governu Timor- Leste hakarak halo levantamentu husi konta Fundu Petrolíferu, Ministru Finansas simplesmente haruka instrusaun de-transferénsia ida mai BCTL hafoin prosesu polítika hotu konklui no publika ona iha Jornal da República, enkuantu restante prosesu ne’e kompeténsia husi BCTL nian.

BCTL nunka hetan impedimentu atu asesu ba konta Fundu Petrolíferu iha Banku Federal Reserve New York, no mós laiha indikasaun ruma husi Federal Reserve Bank of New York atu hakarak foti medidas ba asaun refere.

Governadór hatete katak situasaun ne’e kontráriu tebes. Federal Reserve Bank of New York kontinua sai nafatin parseiru valiozu no konfiante ne’ebé fó-ona sira-nia apoiu mássimu mai BCTL iha jestaun Fundu Petrolíferu dezde inisiu kedas iha tinan 2005. Nia eplika tan hosi kedas 2001 Timor-Leste iha ona relasaun ne’ebé di’ak tebes ho Banku Federal reserve, ne’ebé fasilita ona prosesu pagamentu hotu ne’ebé simu hosi BCTL relasiona ho fundu petrolíferu no mos operasaun bankária sira seluk tan.

Ikus liu, Governadór Vasconselos hakarak apela ba públiku no media sira hotu atu hapara rumoris sira ne’ebé mak espalla ona, no iha futuru mai husu ba públiku no média tenki verifika faktu sira iha BCTL ka Ministériu Finansas molok repete rumoris ne’ebé la-hó justifikasaun kona-ba jestaun Fundu Petrolíferu. REMATA