Polísia Nasional Timor-Leste (PNTL) Distritu Baucau simu tan poder husi Polísia Nasoens Unidas (UNPOL) iha Baucau Sesta 16/04/2010.hodi aumenta tan Distritu lima ne’ebé simu tiha ona.

Serimónia Entrega poder ne’e lidera husi Direktur Jerál Sekretáriu Estadu Seguransa. Sra. Guilhermina Ribeiro infatiza iha importansia natureza PNTL nebé hanesan Polísia Komunitaria, tenki hakbesik aan ba populasaun hodi proteze no defende sira husi ema ne’ebé hakarak halo aat no ajuda komunidade atu resolve sira nia problemas. Maibé, populasaun mós tenki servisu hamutuk ho polísia atu bele fó informasaun, tulun ka monitorizasaun ne’ebé nesesariu hodi bele buka problemas sira ne’ebé eziste. Ho natureza polísia nian ne’ebé iha bele kria mós, estabilidade hodi loke dalan ba Dezenvolvimentu Nasional.

Transferensia Mandatu UNPOL ba PNTL iha Baucau, Vise Reprezentante Espesiál Sekretáriu Jerál Nasoens Unidas nian iha Timor-Leste (VRESJ) Finn Reske Nielsen, iha nia deskursu katak “Estabilidade ba tempu naruk nasaun ne’e nian depende ba dezenvolvimentu makas ba polísia ida mak efektivu no professional atu nune komunidade bele iha konfiansa. Ida ne’e responsabilidade boot ba membru polísia sira hotu, no ami hotu sente haksolok ho ita boot sira tanba hala’o ona responsabilidade ne’e”.

Finn Reske Nielsen mós promete katak, “Nasoens Unidas se aumenta konsentrasaun ba iha monitorizasaun no apoiu ba membru PNTL sira, tuir saida mak husu husi Autoridade Nasionál sira no aprova husi Konsellu Seguransa Nasoens Unidas”.

Partisipa iha Seremónia entrega poder ne’e Reprezentante Sekretáriu Estadu Seguransa Komandante PNTL Distritu Baucau, Segundu komandante PNTL no Reprezentante Sekretáriu Jerál Nasoens Unidas nian iha Timor-Leste (VRESJ).

Misaun Integradu Nasoens Unidas nian iha Timor-Leste (UNMIT) estabelese liu husi rezolusaun Konsellu Seguransa 1704 iha loron 25 agustu tinan 2006.