Parlamentu Nasionál aprova ohin, loron 9 fulan-fevereiru tinan 2021, ho votu afavór 33, kontra 10 no abstensaun 8, Proposta Lei Autorizasaun Lejizlativa kona-ba base jerál sira ba Organizasaun Administrasaun Públika nian.

Proposta Lei ne’e inklui inisiativa lejizlativa lubun ida, ne’ebé propoin husi Ministru Reforma Lejizlativa no Asuntus Parlamentares iha tempu liubá, iha ámbitu programa sira kona-ba reforma administrativa no reforma lejizlativa, ne’ebé buka atu hadi’a jestaun no funsionamentu setór públiku nian.

Tanba organizasaun administrativa ne’e nu’udar instrumentu Estadu nian atu hala’o ninia atribuisaun sira-ne’ebé sai hanesan interese públiku nian hodi hatán ba populasaun nia nesesidade koletiva sira, importante atu organiza loloos Administrasaun Públika Estadu nian, hodi promove efikásia husi ninia atuasaun.

Organizasaun administrativa tenke koerente no omojénea, hodi fasilita kontinuidade husi ninia atividade sira liuhusi interoperasionalidade no interkomunikabilidade rekursus umanus no rekursu materiál sira. Intensaun maka, organizasaun Estadu nian bele sai efisiente liután, hodi organiza an ho kustu ne’ebé ki’ik liu karik bele, atu liberta rekursu sira ba atividade materiál sira ne’ebé buka diretamente satisfás nesesidade koletiva sira. Ikusliu, organizasaun administrativa ne’e tenke satisfás interese públiku no sujeita ba lei, no iha tempu hanesan, proteje didi’ak sidadaun sira-nia direitu.

Iha aprezentasaun Proposta Lei ne’e nian, ne’ebé halo molok debate iha jeneralidade, Ministru Prezidénsia Konsellu Ministrus, Fidelis Manuel Leite Magalhães, esplika katak “autorizasaun ne’e ninia objetivu prinsipál sira mak atu armoniza, define no organiza órgaun administrasaun públika ida-idak no sira-nia kompeténsia sira” no klarifika katak Proposta Lei ne’e “laiha relasaun ho estatutu Komisaun Funsaun Públika nian ka ho Lei ne’ebé kria Komisaun Funsaun Públika”.

Hafoin Proposta Lei ne’e tama iha vigór, Governu iha loron 180 atu define baze sira ba organizasaun administrasaun públika nian.