Governu Timor-Leste nian hato’o ninia kondolénsia ba Sabino Soares “Guntur” ninia mate
Prezidénsia Konsellu Ministrus
VIII Governu Konstitusionál
...........................................................................................................................
Loron 27 fulan-janeiru tinan 2021
Komunikadu Imprensa
Governu Timor-Leste nian hato’o ninia kondolénsia ba Sabino Soares “Guntur” ninia mate
Ho laran triste no neon kraik tebes maka Governu Timor-Leste simu informasaun katak Sabino Soares “Guntur”, Deputadu Parlamentu Nasionál no Vise-Prezidente ba Komisaun Polítika Nasionál husi Partidu Libertasaun Populár nian (PLP), mate ona iha loron 23 fulan-janeiru tinan 2021, iha Ospitál Nasionál Guido Valadares, iha Dili.
Sabino Soares “Guntur” moris iha loron 8 fulan-jullu tinan 1975, iha Lelalai, iha Postu Administrativu Kelikai, Munisípiu Baukau.
Nu’udar membru fundadór PLP nian, hahú fulan-juñu tinan 2018, nia hahú funsaun hanesan deputadu Parlamentu Nasionál Lejizlatura V nian no membru husi Komisaun Edukasaun, Juventude, Kultura no Sidadania (Komisaun G) nian.
Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, aprezenta ninia sentidas kondolénsias ba estimadu “Guntur” nia família no belun sira no hateten katak “ami lamenta ho ninia mate, maibé ami la haluha no ami fó onra ba ninia ninia liman-rohan husi moris ida-ne’ebé nia dedika sein kondisaun ba pátria no ba povu timoroan”. REMATA
