……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 20 fulan-janeiru tinan 2021
Konsellu Ministrus hala’o sorumutuk iha Palásiu Governu, iha Dili no aprova alterasaun ba Proposta Lei kona-ba Enkuadramentu Orsamentu Jerál Estadu nian no ba Jestaun Finanseira Públika, ne’ebé aprova tiha ona iha sorumutuk loron 21 fulan-dezembru tinan 2020 nian, bazeia ba projetu ne’ebé aprezenta husi Ministru Finansas, Rui Augusto Gomes.
Konsellu Ministru analiza projetu Proposta Lei ba alterasaun dahuluk ba Lei n.7/2009, loron 15 fulan-jullu, ne’ebé kria Komisaun Funsaun Públika (KFP), ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães. Projetu Proposta Lei ida ne’e sei kontinua hodi halo análize no sei sai alvu deliberasaun iha sorumutuk Konsellu Ministrus nian tuirmai.
Ministru Finansas aprezenta ona ba Konsellu Ministrus opsaun polítiku-lejizlativa sira ne’ebé sai hanesan baze ba projetu kona-ba Rejime Jurídiku foun ba Aprovizionamentu, ba Kontratu Públiku sira no ninia infrasaun sira. Rejime Jurídiku foun ba Aprovizionamentu nian no ba kontratu públiku sira, nia objetivu mak atu rezolve konstranjimentu sira ne’ebé eziste no hadi’a enkuadramentu normativu ba prosedimentu sira aprovizionamentu nian kona-ba akizisaun bein no servisu sira ka ba ezekusaun obra sira, ne’ebé destina ona ba atende nesesidade sira husi entidade Administrasaun direta no indireta Estadu nian.
Ikusliu, Governu delibera ona atu propoin ba Sua Exelénsia, Señór Prezidente Repúblika, Francisco Guterres Lú Olo, renovasaun estadu emerjénsia nian, ba loron tolunulu tan. Haree ba mudansa preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu COVID-19 nian, tantu iha nivel rejionál, no mós iha nivel mundiál, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu ba sirkulasaun internasionál, ba sirkulasaun no fiksasaun rezidénsia no rezisténsia nian. REMATA