Ministru Prezidénsia Konsellu Ministrus, Fidelis Manuel Leite Magalhães, nu’udar Ministru Defeza ein-ezersísiu, partisipa iha audiénsia ho Komisaun Negósius Estranjeirus, Defeza no Seguransa (Komisaun B), Parlamentu Nasionál nian, iha ámbitu apresiasaun ba proposta ratifikasaun Akordu Servisu Aéreu sira nian entre Governu Timor-Leste no Governu Austrália.

Akordu Servisu Aéreu ne’e nian asina ona husi país rua ne’e iha tinan 2017, no ratifika ona husi Austrália. Akordu ida-ne’e bazeia ba nasaun rua nia hakarak atu promove sistema aviasaun internasionál ida ne’ebé iha konkorrénsia entre empreza transporte aéreu sira iha merkadu, ho servisu sira ne’ebé kompetitivu, inovadór no seguru nian sira.

Akordu ne’e mós ho objetivu atu asegura nivel másimu husi seguransa no protesaun internasional, hodi afirma filafali ninia preokupasaun séria kona-ba aktu no ameasa sira kontra seguransa aeronave nian.

Ho ratifikasaun Akordu ne’e nian, kompañia aérea sira sei bele tama iha espasu aéreu husi nasaun rua ne’e nian la presiza autorizasaun prévia, bainhira kumpre ona rekizitu regulamentár sira, inklui kona-ba seguransa, no ida ne’e sei permite hasa’e konkorrénsia, ne’ebé bele hamenus folin billete no transporte merkadoria sira nian.

Iha audiénsia ne’e, Ministru hatán ba preokupasaun membru sira Komisaun B nian no hatete katak Ministru Defeza laiha kualkér objesaun kona-ba ratifikasaun akordu ne’e nian, no defende vantajen sira husi ninia ratifikasaun.

Iha ámbitu ba apresiasaun akordu ne’e nian, Komisaun B mós rona ba Ministériu Negósius Estranjeirus, Ministériu Transportes no Komunikasoins, Autoridade Nasionál Aviasaun Sivíl Timor-Leste nian (AACTL-sigla lian portugés) no Administrasaun Aeroportu no Navegasaun Aérea Timor-Leste (ANATL) no sei rona mós Ministériu Interiór.