Ministru Prezidénsia Konsellu Ministrus, Fidelis Manuel Leite Magalhães, iha loron 12 fulan-janeiru tinan 2021 hala’o sorumutuk), iha Palásiu Governu, ho Diretór Ezekutivu Nasionál husi Compact Development Team (CDT-TL – sigla iha lian inglés), Embaixadór Constâncio Pinto, ne’ebé responsavel ba ekipa husi dezenvolvimentu kompaktu ba projetu dezenvolvimentu nian sira, ne’ebé finansia husi ajénsia norteamerikana Millennium Challenge Corporation (MCC – sigla iha lian inglés.

Durante sorumutuk ne’e, halo análize ba atividade sira ne’ebé hala’o ona iha tinan 2020 no prioridade sira ba tinan 2021, ne’ebé relasiona ho estudu preparatóriu sira no ho levantamentu dadus ba projetu sira bee no saneamentu nian, infraestrutura drenajen no edukasaun, iha ámbitu programa ida-ne’e nian.

Prevee katak iha fulan-juñu tinan 2021 sei asina akordu entre MCC no Governu Timor-Leste, ba implementasaun kompaktu ne’e, durante períodu tinan lima nian, ho apoiu ne’ebé fornese husi ajénsia norteamerikana, ne’ebé prevee ho montante dolar amerikanu millaun 285, depende ba rezultadu sira husi estudu viabilidade ne’ebé la’o hela.

Programa ne’e, ne’ebé lidera husi Ministru Prezidénsia Konsellu Ministrus, ninia objetivu mak atu hadi’a kondisaun moris sidadaun sira nian, ho halakon deznutrisaun no rakitizmu, liuhusi, entre medida sira seluk, konstrusaun infraestrutura sira saneamentu báziku nian, konstrusaun infraestrutura hodi asesu ba bee moos ba ema hotu, adosaun ba programa espesífiku sira nutrisaun nian no hadi’a asesu ba servisu saúde públika nian sira ho kualidade. Objetivu Programa ne’e mós atu hasa’e kualidade rekursus umanus nasionál sira, ho investimentu iha infraestrutura eskolár, formasaun no revizaun kurrikulár.

MCC ne’e fó sai ona, liuhusi karta ida-ne’ebé dirije ba Primeiru-Ministru, Taur Matan Ruak, iha fulan-dezembru liubá, katak nia hili filafali Timor-Leste atu kontinua dezenvolve kompaktu ne’e, “nu’udar rekoñesimentu ba parseria sólida ne’ebé eziste to’o oras ne’e no ba kompromisu metin Timor-Leste nian hodi hametin instituisaun demokrátika sira, mantein polítika ekonómika ne’ebé sólida no investimentu ba-iha ninia povu”.

Iha karta ne’e, Diretór Ezekutivu MCC, Sean Cairncross, mós hato’o “apresiasaun ba lideransa governamentál ne’ebé lori programa ne’e, liuhusi Ministru Fidelis Magalhães no CDT-TL, ho kontribuisaun husi liña ministeriál relevante sira, ba dezenvolvimentu kompaktu ida ne’ebé orientadu ba rezultadu sira no ne’ebé bele hatudu prioridade Timor-Leste nian”.