Ministru Prezidénsia Konsellu Ministrus, Fidelis Manuel Leite Magalhães, hala’o vizita ba dala uluk, iha loron 11 fulan-janeiru tinan 2021, ba Institutu Nasionál Administrasaun Públika (INAP), hafoin Primeiru-Ministru, Taur Matan Ruak, iha loron 30 fulan-dezembru tinan 2020, delega ba nia podér sira kona-ba superintendénsia no tutela kona-ba institutu nasionál ne’ebé garante formasaun, valorizasaun no sertifikasaun profisionál espesífika ba funsionáriu, traballadór iha Administrasaun Públika, líder podér lokál nian no lideransa komunitária sira.

Ministru Prezidénsia Konsellu Ministrus maka lidera implementasaun husi Programa Reforma Administrasaun Públika (PRAP), ne’ebé ninia objetivu mak atu transforma administrasaun públika, ho foku ba estrutura sira podér sentrál nian. Reforma ida-ne’e hakarak atu hadi’a prosesu prestasaun servisu nian sira, atu fortalese responsabilidade no insentivu sira dezempeñu nian, atu hadi’a jestaun no dezenvolvimentu rekursus umanus nian, atu revee funsaun no estrutura sira administrasaun públika nian no atu hadi’a servisu administrativu sira ne’ebé presta ba sidadaun no ba empreza sira.

Hanesan temi iha Despaxu N. 120 /PM/XII/2020 loron 30 fulan dezembru, “Haree katak komponente esensiál ida mós husi PRAP refere ba jestaun no dezenvolvimentu rekursus umanus Funsaun Públika nian, ligasaun ida-ne’ebé besik entre funsaun sira ne’ebé atribui ba Ministru Prezidénsia Konsellu Ministrus, iha nivel governamentál, no funsaun sira ne’ebé atribui ba Institutu Nasionál Administrasaun Públika, iha nivel implementasaun asaun formativa sira ba kapasitasaun rekursus umanus Funsaun Públika nian, konsidera konveniente no ho benefísiu boot.”

Hodi ezerse podér sira ne’ebé delega ona ba nia, Ministru Prezidénsia Konsellu Ministrus sei orienta INAP atu dezenvolve no implementa estratéjia organizasionál ida-ne’ebé prioritária no klara, no mós dezenvolve no implementa planu reforma nian ida, inklui reestruturasaun ba INAP rasik no realokasaun pesoál ne’ebé presiza halo, tanba reestruturasaun ne’e.

Fidelis Magalhães sei fó apoiu ba INAP atu dezenvolve, fortalese no implementa parseria estratéjika sira ho universidade lokál sira no provedór formasaun nian hirak ne’ebé kualifikadu, ho Komisaun Funsaun Públika no ho eskola internasionál servisu públiku nian sira.

Sei fó apoiu mós ba INAP atu dezenvolve produtu no kurríkulu sira ho kualidade aas ne’ebé bele oferese kursu lideransa no jestaun nian sira-ne’ebé relevante no signifikativu.