……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 16 fulan-dezembru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu Rezolusaun Governu nian, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, ba nomeasaun Jaime Fernando dos Mártires Carvalho Correia, nu’udar Prezidente Konsellu Diretivu Imprensa Nasionál Timor-Leste, I. P. (INTL) nian, ba períodu tinan 4.
Hetan ona provasaun mós maka projetu deliberasaun, ho alterasaun, ne’ebé aprezenta husi Ministru Obras Públikas, Salvador Soares dos Reis Pires, kona-ba aprovasaun ba prosedimentu aprovizionamentu ba suplementu, ka alterasaun, husi Kontratu Públiku, kona-ba estensaun períodu servisu supervizaun nian husi obra melloramentu no manutensaun estrada husi Baukau ba Lautein, husi Maubara ba Karimbala, no husi Atabae ba Mota-Ain.
Ikusliu, Konsellu Ministrus aprova ona projetu Dekretu Governu nian kona-ba alterasaun dahuluk ba Dekretu Governu nian n. 14/2020, loron 23 fulan-outubru, kona-ba ezekusaun Orsamentu Jerál tinan 2020 nian. Ho alterasaun ida-ne’e, formuláriu kompromisu ba pagamentu (FCP) sei bele lansa iha Sistema Integradu Jestaun Finanseira (SIGF) to’o loron 17 fulan-dezembru tinan 2020. REMATA