Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ho Koordenadór Rezidente Nasoins Unidas nian iha Timor-Leste, Roy Trivedy, iha loron 15 fulan-dezembru tinan 2020, iha Palásiu Governu, iha ámbitu programa Reforma Administrasaun Públika.

Programa ba Reforma Administrasaun Públika ne’ebé lidera husi Ministru Prezidénsia Konsellu Ministrus, ninia objetivu mak atu transforma administrasaun públika, liuliu haree ba estrutura sira podér sentrál nian. Reforma ida-ne’e buka atu hadi’a prosesu prestasaun servisu nian sira, fó kbiit ba responsabilidade no insentivu sira ba dezempeñu, hadi’a jestaun no dezenvolvimentu rekursus umanus, haree fali ba funsaun no estrutura administrasaun públika nian sira no hadi’a servisu administrativu sira ne’ebé halo ba sidadaun no ba empreza sira.

Durante sorumutuk ne’e, Governante no responsavel Nasoins Unidas nian iha Timor-Leste diskute kestaun sira kona-ba kooperasaun nian atu reforsa administrasaun públika, atu dezenvolve no diversifika ekonomia no atu reforsa setór privadu.

Diskute mós kona-ba kriasaun husi Delivery Unit (Unidade Entrega nian) ida hodi tulun Governu atu define no monitoriza prioridade no progresu sira ne’ebé alkansa ona no iha fortalesimentu husi kapasidade institusionál, ho hanoin atu hadi’a prestasaun servisu públiku sira.