Governu liu hosi Ministériu Solidariedade Sosiál no Inkluzaun-MSSI halo ona pagamentu subsídiu agregadu famíliar $.200 ba reklamantes elizível hamutuk 2 mil resin, Ekipa pagamentu iha faze daruak ne’e kompostu husi funsionárius Sentru Solidariedade Sosiál Munisípius ida-idak nian ne’ebé servisu hamutuk ho Autoridades lokais sira inklui Ofisial Polisia Suku-OPS. Pagamentu segundu faze ida ne’e hahu iha Loron Segunda-Feira (23/11/2020).

Munisípiu Díli iha total reklamantes (1.291), Ainaro (120), Aileu (98), Baucau (304), Bobonaro (17), Covalima (130), Ermera (31), Lautem (84), Liquiça (386), Manatuto (109), Manufahi (31), RAEOA (266) no Viqueque iha totál reklamantes (22). Durasaun pagamentu mínimu loron 3 no másimu loron 5.

Iha pagamentu faze daruak ida ne’e, Diretór Sentru Solidariedade Sosiál Munisípiu Manatuto, Reinaldo Soares hateten, dadus reklamantes iha Munisípiu Manatuto ne’ebé aprovadu hamutuk 109 reklamantes, maibé ekipa konsege halo deit pagamentu ba reklamantes hamutuk 95, tanba husi lista hirak ne’e balun doubru no identifika katak balun simu ona iha faze primeiru maibé naran nafatin sai iha lista pagamentu faze segundu nian.

Enkuantu, Xefe Suku Orlalan, Postu Administrativu Laclubar, Munisípiu Manatuto, Carlos de Alves hateten, prosesu pagamentu ba segundu faze ida ne’e la’o di’ak, maibé hanesan autoridade lokais ladun satisfas ba governu sentral, tanba reklamantes barak mak naran la sai iha lista aprovadu ba pagamentu segundu faze ida ne’e. Reklamantes iha Suku Orlalan rasik hamutuk ema nain 17, maibé ikus mai aprova ema nian 2 deit.

“Hau rekomenda ba MSSI atu toma responsabilidade ba hirak ne’ebé mak seidauk hetan ninia direitu katak reklamantes ne’ebé nia naran la aprovadu ministériu bele responde fila fali nune’e sira mós bele hetan sira nia direitu ba subsídiu ida ne’e”, dehan Xefe Suku Orlalan.

Nune’e mós, Xefe Ekipa Pagamentu Munisípiu Díli, João Bosco Mendonça esplika, total reklamantes iha munisípiu Díli hamutuk 4,872 famílias ne’ebé hatama sira nia reklamasaun, husi total refere, iha 1,284 famílias mak hetan aprovasaun no agora dadaun ekipa hala’o hela pagamentu, iha suku balun iha Munisípiu Díli ramata ona, maibé iha mós suku balun mak seidauk tanba iha desentendementu, maibé ekipa kontinua nafatin hala’o pagamentu. Durante pagamentu, iha mós benefisiárius hamutuk ema nain 26 mak la mai simu sira ninia direitu, tanba ne’e ekipa sei hatama fila fali osan hirak ne’ebé mak iha ba iha banku.