Prezidente Repúblika, Francisco Guterres Lú Olo, hafoin simu pedidu husi Governu, dekreta ona, ohin, loron 3 fulan-dezembru tinan 2021, renovasaun ba estadu emerjénsia ba loron 30 tan, hahú husi tuku 00:00, loron 4 fulan-dezembru tinan 2020 to’o tuku 23:59, loron 3 fulan-janeiru tinan 2021.

Governu delibera ona, iha sorumutuk Konsellu Ministrus nian iha loron 25 fulan-novembru tinan 2020, atu propoin ba Prezidente Repúblika, Francisco Guterres Lú Olo, renovasaun ba Estadu Emerjénsia, ba loron tolunulu tan. Hafoin hetan paresér pozitivu sira husi Konsellu Estadu no husi Konsellu Superiór Defeza no Seguransa nian, Parlamentu Nasionál, ohin dadeer, iha Plenáriu, autoriza ona Prezidente Repúblika atu deklara renovasaun estadu emerjénsia ba dala ualu, dezde pandemia COVID-19 mosu.

Iha loron hanesan, Governu, iha sorumutuk Konsellu Ministrus nian, aprova ona medida sira ba ezekusaun estadu emerjénsia nian.

Husi kedas hahú pandemia ne’e, Timor-Leste rejista ona totál kazu konfirmadu Coronavírus foun hamutuk 31, husi númeru ida-ne’e, ema na’in 30 maka rekupera ona no iha kazu ativu ida.

Númeru infetadu husi SARS-Cov-2 iha mundu liu ona ema millaun 64,8 no kuaze ema millaun 1,5 maka mate ona tanba COVID-19.