Sorumutuk Konsellu Ministrus nian iha loron 3 fulan-dezembru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 3 fulan-dezembru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian, ne’ebé aprezenta husi Primeiru-Ministru, Taur Matan Ruak, kona-ba medida sira ezekusaun estadu emerjénsia nian, ne’ebé renova husi Dekretu Prezidente Repúblika nian N. 70/2020, loron 3 fulan-dezembru, atu hatán ba pandemia husi COVID-19. Estadu emerjénsia ne’ebé ohin renova ona, abranje ba territóriu nasionál tomak no vigora entre oras 00.00 husi loron 4 fulan-dezembru tinan 2020 no to’o oras 23.59 loron 2 fulan-janeiru tinan 2021.
Dekretu Governu ne’e rekomenda katak sidadaun hotu-hotu ne’ebé hela iha territóriu nasionál tenke buka adota no promove adosaun ba komportamentu sira kona-ba distansiamentu sosiál, mak hanesan evita halibur malu, mantein distánsia ida, pelumenus metru ida ho balun entre ema ida- ho ema seluk, ho sira ne’ebé mak la moris hamutuk iha família nia laran, utiliza máskara fasiál ne’ebé taka inus no ibun bainhira tama iha fatin ne’ebé taka metin no ema barak halibur malu no fase liman beibeik, liuliu iha kontaktu ho sasán sira, hanesan osan, no bainhira hakarak tama iha estabelesimentu komersiál sira ka iha edifísiu sira ne’ebé funsiona servisu administrasaun públika nian.
Ba indivíduu hotu-hotu ne’ebé hakarak tama no sai husi territóriu nasionál, obrigatóriu, tenke sujeita ba kontrolu sanitáriu. Sei sai mós obrigatóriu ba izolamentu profilátiku (kuarentena) ho durasaun mínima loron sanulu resin-haat no halo teste ba COVID-19 nian, ba sidadaun sira ne’ebé hakarak tama iha país ne’ebé hatudu sintomatolojia husi COVID-19, ka ema sira iha ona kontaktu ho indivíduu sira ne’ebé infetadu ho SARS-Cov-2. Ba despeza sira ne’ebé relasiona ho izolamentu profilátiku, sei suporta husi indivíduu ida-idak bainhira kumpre iha estabelesimentu saúde, rezidénsia ka iha sentru izolamentu privadu sira, indivíduu sira ne’e maka sei selu rasik.
Sei nafatin bandu atu hakat liu fronteira terrestre nian ba fins tradisionál ka kostumeiru nian sira no mós ba asesu merkadu sira ne’ebé regula ona, sei mantein nafatin ba sansaun sira ne’e. Ema estranjeiru sira ne’ebé tama iha territóriu nasionál, liuhusi fronteira terrestre sira, nafatin sujeita ba autorizasaun prévia.
Durante períodu vijénsia estadu emerjénsia nian lisensa hotu-hotu, autorizasaun no atu administrativu sira seluk no dokumentu sira mantein válidu la haree ba ninia validade prazu nian. REMATA
