Ministra Finansas Interina, Sara Lobo Brites, akompaña husi Ministru Agrikultura no Peskas, Pedro Reis no husi reprezentante FAO nian iha Timor-Leste, Dagen Liu, halo lansamentu “Relatóriu Sensu Agríkola 2019 nian”, iha Auditóriu Xanana Gusmão, iha Ministériu Finansas, iha loron 10 fulan-novembru tinan 2020. Ida-ne’e hanesan sensu agríkola dahuluk ne’ebé realiza dezde Timor-Leste ukun an. [Sensu Agríkola Timor-Leste 2019] ne’e maka dokumentu importante ida, ne’ebé ninia konkluzaun prinsipál sira, Governu, parseiru dezenvolvimentu nian sira no setór privadu sei utiliza atu formula polítika sira bazeia ba evidénsia sira atubele dezenvolve setór agríkola nian, ne’ebé maka sai nu’udar setór importante ida mós ba dezenvolvimentu ekonomia nasaun nian.

Ministra Finansas Interina, iha ninia diskursu, hateten katak “Governu empeñadu ona atu promove polítika hirak ne’ebé bazeia ba evidénsia sira no iha sentidu ida-ne’e, Sensu Agríkola sei komplementa Sensu Uma Kain nian, ne’ebé sei realiza iha tinan 2021, no Inkéritu kona-ba Padraun Moris nian iha Timor-Leste, ne’ebé sei hala’o iha tinan 2022”.

Partisipa mós iha serimónia ne’e maka Diretór-Jerál Estatístika nian, Elias dos Santos Ferreira, Diretór Nasionál Estatístika nian, Silvino Lopes, reprezentante sira husi Ajénsia ONU nian sira, inklui FAO, ne’ebé fó asisténsia téknika ba membru sira husi Komisaun Téknika no reprezentante sira husi grupu relijiozu sira no husi sosiedade sivíl.