Sorumutuk Konsellu Ministrus nian iha loron 4 fulan-novembru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 4 fulan-novembru tinan 2020
Konsellu Ministrus hala’o sorumutuk iha Palásiu Governu, iha Dili, no delibera ona, liuhusi proposta Vise-Primeiru-Ministru no Ministru Planu no Ordenamentu nian, José Maria dos Reis, prosede ho projetu ligasaun dijitál Timor-Leste nian, liuhusi kabu submarinu fibra ótika, ne’ebé liga ba sidade sira Darwin no Port Hedland, iha Commonwealth Austrália.
Aprova mós prosedimentu aprovizionamentu nian ba kontratu atu aluga infraestrutura husi deskarga kombustivel ba depózitu Sentrál Elétrika Hera nian ba períodu tinan tolu, ne’ebé aprezenta husi Ministru Obras Públikas, Salvador Soares dos Reis Pires, ho hanoin katak Estadu la iha infraestrutura ne’e no presiza aluga empreza privada sira ba ninia utilizasaun iha deskarga kombustível esensiál ba produsaun enerjia nian iha sentrál elétrika sira.
Ministru Administrasaun Estatál, Miguel Pereira de Carvalho, aprezenta ona ba Konsellu Ministrus opsaun sira polítiku-lejizlativa subjasente sira ba anteprojetu husi Proposta Lei kona-ba alterasaun dahuluk ba Lei Resenseamentu Eleitorál no ba anteprojetu husi Proposta Lei kona-ba alterasaun datoluk husi Lei Órgaun sira Administrasaun Eleitorál nian. Intervensaun normativa sira ne’e ninia objetivu atu prosede ajustamentu balun ba prosedimentu sira resenseamentu nian hodi konfere transparénsia boot liu ba prosesu resenseamentu eleitorál, nune’e mós introduzus ajuste balun ba Lei órgaun sira Administrasaun Eleitorál nian, liuliu iha promosaun ba kolaborasaun ida ne’ebé boot entre órgaun rua Administrasaun Eleitorál nian, ho objetivu atubele halo koordenasaun ida-ne’ebé efikás liu entre sira, atu hodi atinje padraun ida-ne’ebé aas tebes edukasaun sívika nian entre populasaun no divulgasaun ne’ebé uniforme husi informasaun iha matéria eleitorál nian.
Ikusliu, Primeiru-Ministru, Taur Matan Ruak, no reprezentante nasionál sira husi Movimentu Scalling Up Nutrition, halo aprezentasaun ida ba Konsellu Ministrus kona-ba estrutura no rezultadu komún sira kona-ba Planu Asaun Konsolidadu Nasionál Seguransa Alimentár no Nutrisaun nian. Planu ne’e aprezenta prioridade prinsipál sira ne’ebé sei kumpre husi Ministériu relevante sira, Parseiru sira, Organizasaun Naun Governamentál sira no Sosiedade Sivíl, atu atinje objetivu husi Dezenvolvimentu Sustentavel 2 (ODS2) nian, husi redusaun má-nutrisaun no inseguransa alimentár nian iha Timor-Leste to’o tinan 2030. REMATA
