Membru Governu Konstitusionál VIII no membru bankada parlamentár sira husi partidu sira Governu nian, ohin loron 30 fulan-outubru tinan 2020, hala’o retiru, iha Politéknika Hera, iha ámbitu preparasaun ba diskusaun Orsamentu Jerál Estadu (OJE) nian ba 2021.

OJE 2021 nian, ne’ebé Governu entrega ona ba Parlamentu Nasionál, iha loron 15 fulan-outubru liubá, ninia prioridade sira maka dezenvolvimentu kapitál sosiál, dezenvolvimentu ekonómiku, ne’ebé aliña ho medida hirak ne’ebé inklui ona iha Planu Rekuperasaun Ekonómika, dezenvolvimentu infraestrutura bázika fundamentál sira, dezenvolvimentu ambientál no dezenvolvimentu institusionál no prosesu reforma institusionál sira ne’ebé maka hala’o hela.

Siklu audiénsia públika sira ne’ebé Parlamentu Nasionál promove ona atu halo ba apresiasaun inisiál ba OJE 2021 nian, sei hahú iha kuarta oinmai, loron 4 fulan-novembru, ho semináriu ida ne’ebé sei hala’o iha Otél Novo Turizmu, iha Dili.

Proposta Lei OJE 2021 ne’e aprezenta reseita no despeza hotu-hotu husi órgaun no servisu sira husi Setór Públiku Administrativu nian ba tinan finanseiru 2021, ho montante globál husi despeza konsolidada ne’ebé fiksa ona maka millaun USD millaun 2.029,5. OJE ne’e kompostu husi Orsamentu Administrasaun Sentrál, husi Orsamentu Rejiaun Administrativa Espesiál Oekusi Ambenu nian no husi Orsamentu Seguransa Sosiál nian.

“Despeza husi órgaun no servisu Administrasaun Sentrál nian sa’e ba USD millaun 1.797,2” no ninia “dotasaun sira fahe tuir klasifikasaun ekonómika ho forma tuirmai ne’e: USD millaun 228,2 ba Saláriu no Vensimentu; USD millaun 397,3 ba Beins no Servisu; USD millaun 694,9 ba Transferénsia Públika; USD millaun 58.8 ba Kapitál Menór; US millaun 417.7 ba Kapitál Dezenvolvimentu”.

“Despeza [Seguransa Sosiál nian] nia montante maka USD millaun 177,3” no “despeza sira ba Rejiaun Administrativa Espesiál Oekusi Ambenu (RAEOA) sa’e ba USD millaun 127,0”. “Dotasaun ba despeza [RAEOA] nian fahe tuir klasifikasaun ekonómika ho forma tuirmai ne’e: US millaun 11,1 ba Saláriu no Vensimentu; USD millaun 23,8 ba Beins no Servisu; USD millaun 4,3 ba Transferénsia Públika; USD millaun 2.4 ba Kapitál Menór; USD millaun 85,5 ba Kapitál Dezenvolvimentu”.