Sorumutuk Estraordináriu Konsellu Ministrus nian iha loron 23 fulan-outubru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordináriu Konsellu Ministrus nian iha loron 23 fulan-outubru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona ho alterasaun sira, projetu Dekretu Governu nian, ne’ebé aprezenta husi Ministra Finansas iha ezersísiu, Sara Lobo Brites, kona-ba ezekusaun Orsamentu Jerál Estadu nian (OJE) ba 2020.
Dekretu Governu nian ne’e hatuur regra sira kona-ba ezekusaun Orsamentu Jerál Estadu nian ba tinan 2020, ne’ebé hetan aprovasaun husi Lei n. 10/2020, loron 19 fulan-outubru no aplika ba orsamentu sira ba órgaun no servisu sira husi Administrasaun Sentrál, Rejiaun Administrativa Espesiál Oekusi Ambenu no Seguransa Sosiál.
Regra hirak ne’ebé hatuur iha diploma ne’e ninia objetivu maka, liu-liu, atu regula no fasilita ezekusaun orsamentu iha fulan hirak ikus tinan ida-ne’e nian. Maioria husi norma hirak ne’ebé hatuur ba OJE tinan 2019 nian prodús fila-fali iha Dekretu Governu nian ida-ne’e, maibé ninia redasaun halo simples liután no ninia organizasaun mós hadi’a ona atu fasilita ninia interpretasaun husi responsavel finansas nian sira husi setór públiku administrativu.
Liu-liu, halo klarifikasaun kona-ba prosesu realizasaun despeza, ho identifikasaun ne’ebé klara kona-ba faze oin-oin, atubele halakon dúvida hirak ne’ebé impede hela to’o oras ne’e inísiu husi prosedimentu aprovizionamentu nian sira ka asume kompromisu, liu-liu kompromisu sira husi natureza plurianuál.
Iha kontinuasaun husi esforsu atu halo desentralizasaun prosedimentu sira ezekuasaun orsamentu nian, prevee posibilidade atu delega membru Governu sira-nian kompeténsia oin-oin ba diretór-jerál administrasaun no finansas nian iha ninia ministériu ka Sekretaria Estadu nian ne’ebé la integra iha ministériu, ka ba titulár kargu diresaun no xefia nian ne’ebé ekiparadu. REMATA
