Governu Timor-Leste

Ohin, loron 13 fulan-outubru tinan 2020, Timor-Leste adere ona ba Movimentu Scalling Up Nutrition (Movimentu SUN), inisiativa ida-ne’ebé harii husi entidade, ajénsia no grupu governamentál sira iha fulan-setembru tinan 2010, ho prinsípiu ida katak ema hotu iha direitu ba ai-han no ba nutrisaun ne’ebé adekuada.

Timor-Leste mai hamutuk ho país membru neen-nulu resin ida, ne’ebé buka atu serbisu hamutuk hodi hetan métodu loloos no atu rezolve problema nutrisaun iha sira nia nasaun. Adezaun Timor-Leste nian ba Movimentu SUN sei permite atu fahe dezafiu sira kona-ba má nutrisaun iha Timor-Leste no atu aprende ho kazu susesu iha melloria nutrisaun nian, no mós atu adere ba rede ida husi ajénsia, instituisaun no doadór sira, hodi kontribui ho forma desiziva atu hadi’a saúde no moris di’ak populasaun nian iha Timor-Leste.

Primeiru-Ministru, Taur Matan Ruak, iha nia mensajen ne’ebé publika ohin, afirma katak “Timor-Leste asume ona kompromisu atu hadi’a kondisaun moris populasaun sira-nian, liuliu iha sira nia moris di’ak iha área edukasaun, saúde no ai-han, no asesu ba serbisu no infraestrutura bázika sira, hodi kontribui ba dezenvolvimentu no estabilidade ekonómika país nian”.

Xefe Governu esplika mós katak “ita-nia adezaun ba Movimentu Globál ba Melloria Nutrisaun” justifika liuhusi “ita-nia estratéjia atu kombate kiak no má nutrisaun labarik no familiár nian sira”. Hatutan mós katak Governu hakarak atu “mobiliza rekursus umanus no finanseirus, liuhusi estabelesimentu Parseria Públika no Privada foun sira, hodi implementa Roteiru Operasionál ida ba Movimentu SUN iha Timor-Leste, hodi apoia planu no polítika nutrisaun nasionál nian-sira”.

Primeiru-Ministru fiar katak “ho apoiu husi Movimentu SUN iha Timor-Leste, ita bele hahú fó moris ida di’ak liu ba labarik sira, hodi kontribui atu hamenus númeru subnutrisaun no mortalidade infantíl, hodi asegura dezenvolvimentu ba sosiedade ida-ne’ebé saudavel no ativa, ho ai-han di’ak ba labarik sira, família próspera no populasaun sira forte ”.