Governu felisita Programa Alimentár Mundiál tanba simu Prémiu Nobel Pás ba tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Loron 9 fulan-outubru tinan 2020
Komunikadu Imprensa
Governu felisita Programa Alimentár Mundiál tanba simu Prémiu Nobel Pás ba tinan 2020
Governu Timor-Leste nian saúda atribuisaun Prémiu Nobel Pás ba tinan 2020 ba programa Nasoins Unidas “World Food Programme”, Programa Alimentár Mundiál, tanba “ninia esforsu iha luta hasoru hamlaha, tanba ninia kontribuisaun sira atu hadi’a kondisaun sira pás nian iha zona konflitu nian sira no tanba dezempeña papel fundamentál ida atu prevene husi uzu hamlaha hanesan kilat funu no konflitu nian”.
Distinsaun ida-ne’e reprezenta rekoñesimentu ida husi traballu importante ne’ebé hala’o ona husi organizasaun umanitária ida ne’e, ne’ebé iha tinan 2019 fó asisténsia ba ema besik millaun 100 iha país 88.
Iha Timor-Leste, Programa Alimentár Mundiál, aleinde ninia servisu ne’ebé iha kolaborasaun no koordenasaun besik ho Governu, atu atinje Objetivu sira Dezenvolvimentu Sustentavel nian kona-ba programa sira seguransa alimentár no nutrisaun no kombate hamlaha, fó ona apoiu importante ida hodi hatán ba impaktu sira husi COVID-19 nian, liuliu ho servisu vou umanitáriu sira entre Kuala Lumpur no Díli, ba pasajeiru sira no karga médika, ne’ebé permite Timor-Leste atu reduz izolamentu ne’ebé provoka husi pandemia COVID-19, lori ekipamentu médiku sira to’o país no permite sirkulasaun profisionál umanitáriu sira husi ajénsia oioin ne’ebé hela iha país ne’e, atu apoia hodi hatán ba COVID-19 .
Lori Governu no Povu Timor-Leste nia naran, Ministru Prezidénsia Konsellu Ministrus no Porta-Voz Governu nian, Fidelis Manuel Leite Magalhães, hakarak transmite nia sinsera felisitasaun sira no nia mellores kumprimentus ba ekipa hotu husi Programa Alimentár Mundiál, tanba rekoñesimentu ida-ne’e ba ninia servisu valiozu, no saúda mós parseria entre Programa Alimentár Mundiál nian ho Governu Timor-Leste, hodi alkansa ita-nia objetivu dezenvolvimentu sustentavel. Remata
