Governu Timor-Leste

Tuir estrutura IV Governu Konstitusionál, Ministériu Túrizmu, Komérsiu no Indústria (MTKI), iha Diresaun Nasionál ba Kómersiu Doméstiku (DNCD), ne’ebé haree no rejista empresa lokál no internasionál sira.

Governu fó prioridade ba empreza sira ne’e tanba sira mak sai hanesan parseiru ba Governu hodi implementa no jere osan Estadu nian ne’ebé Governu ka’er, liu husi konstrusaun no rekonstrusaun ba projetu sira Estadu nian.

Iha biban ida-ne’e Diretór Nasional Komérsiu Indústria, Fernando da Silva hateten katak “ to’o fulan Fevereiru tinan 2010 empreza nasionál no estranjeiru sira ne’ebé rejistu ona iha DNKD hamutuk rihun ida atus tolu sia nulu resin sia (1.399).

Husi totál 1.399 ne’e, empreza nasionál sira ne’ebé rejistu hamutuk 1.338 no empreza estranjeiru sira hamutuk 61. Kompara ho tinan 2009, totál empreza nasionál no estranjeiru sira ne’ebé rejistu iha Diresaun Nasionál hamutuk 4.251, mai husi empreza nasionál sira 3.181 no empreza estranjeiru 1.070.

“Iha posibilidade, to’o tinan 2010 nia rohan empreza nasionál sira sei sa’e maka’as liután husi tinan 2009. Husi dadu sira ita bele haree, foin fulan Fevereiru, totál empreza nasionál sira ne’ebé rejistu tiha ona ho volume ne’ebé as kompara ho tinan hirak liubá.

Haree ba Polítika IV Governu Konstitusionál nian ne’ebé fó rekoñesimrntu no prioridade ba iha empreza sira no negósiu ki’ik sira atu rejista, nune’e mak rejista ho volume rejistu empreza sira ne’ebe sa’e maka’as tanba tinan 2009 iha desizaun Governu ne’ebé loke oportunidade ba empreza nasionál sira atu tuir konkursu ba Projetu Pakote Referendum.

Kona-ba rejistu mikru empreza sira, tuir Fernando, to’o fulan Fevereiru tinan 2010, iha empresa atus hitu tolu nulu resin haat (743), husi Distritu sanulu resin tolu mak hetan ona sertifikadu. Maske iha tinan 2009 totál mikro empreza sira ne’ebé rejistu iha 1.262 “Tinan 2009 ne’e sa’e maka’as liután, kompara ho tinan 2008, mikro empreza sira ne’ebé rejista hamutuk 849 iha MTCI”.

Aleinde ne’e, iha fulan Fevereiru 2010, empreza sira ne’ebé emprega traballadór sira rejistu iha DNCD hamutuk ema 3.391, tuir dadu sira ne’ebé emprezáriu sira prenxe iha formuláriu Ministériu nian. Valór ida ne’e, mai husi 3.320 traballadór nasionál sira no traballadór estranjeiru sira 71, tama ona iha lista rejistu DNCD nian.

Governu, liu husi servisu inter-Ministériál fasilita atendimentu ba kliente sira ho di’ak atu dezenvolve rai Timor-Leste hodi ba oin.

Atu hetan informasaun klaru liu tan, bele kontaktu: Diretór Nasionál Kómersiu Doméstika (DNKD), Fernando da Silva : 7236350, email: commersiu.domestic@gmail.com.