Sorumutuk Konsellu Ministrus nian iha loron 30 fulan-setembru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 30 fulan-setembru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona ho alterasaun sira, projetu Dekretu-Lei, ne’ebé Ministru Obras Públikas, Salvador Soares dos Reis Pires, aprezenta kona-ba fornesimentu kombustivel husi Timor Gap, EP ba Eletrisidade Timor-Leste (EDTL, EP) nian. Projetu Dekretu-Lei ne’e nu’udar objetu regulamentasaun ba fornesimentu kombustivel ho regulár no obrigatóriu husi TIMOR GAP ba EDTL, nune’e, permite fornesimentu kombustivel nian ne’ebé nesesáriu ho seguru liu ba funsionamentu sentru produsaun eletrisidade nian sira. TIMOR GAP tenke fornese kombustivel ho kondisaun ne’ebé mak seguru no bazeia ba akordu valór no espesifikasaun téknika nian sira ne’ebé hakerek ona iha kontratu.
Ministru Defeza, Filomeno da Paixão de Jesus, aprezenta ona opsaun polítika-lejizlativa sira ne’ebé relasiona ho projetu Dekretu-Lei kona-ba Estatutu Orgániku F-FDTL nian no ba projetu Dekretu-Lei ba kriasaun Unidade FALINTIL nian.
Konsellu Ministrus aprova ona projetu Deliberasaun, ne’ebé aprezenta husi Vise-Ministra Finansas, Sara Lobo Brites, relasiona ho tetu finál ba dotasaun orsamentál temporária ba fulan-outubru tinan 2020 nian, ne’ebé nia valór fiksa ona ho montante dolar amerikanu millaun 117,1 (inklui pagamentu ba empréstimu sira).
Ikusliu, aprova mós projetu Deliberasaun, ne’ebé Vise-Ministra Finansas aprezenta, kona-ba aprovasaun preliminár ba tetu agregadu no dezagregadu ba Orsamentu Jerál Estadu tinan 2021, ho montante totál preliminár, refere ba tetu agregadu, dolar amerikanu billaun 1,895 tuir konsiliasaun rezultadu husi análize ba submisaun setoriál orsamentál setoriál nian sira, ne’ebé Komité Revizaun Polítiku (ne’ebé koñesidu ho akrónimu KROP) hakotu ona horiseik, hodi permite Ministériu Finansas kontinua nafatin ba preparasaun Orsamentu Jerál Estadu tinan 2021 nian. Tetu finál sei aprova iha sorumutuk Konsellu Ministrus nian tuir mai, no sei entrega ba Parlamentu Nasionál iha loron 15 fulan-outubru oin mai. REMATA
