Iha dadeer ne’e, loron 23 fulan-setembru tinan 2020, iha Parlamentu Nasionál, hahú siklu audiénsia públika nian ida ne’ebé promove husi Komisaun Espesializada Permanente Parlamentu Nasionál nian, kona-ba apresiasaun inisiál ba Proposta Lei kona-ba Orsamentu Jerál Estadu nian (OJE) ba tinan 2020. Audénsia públika sira-ne’e hala’o to’o loron 25 fulan-setembru.

Durante períodu ida-ne’e, Komisaun sira sei simu membru Governu sira, Prezidénsia Repúblika, Dirijente sira husi Administrasaun Públika nian no reprezentante sira husi sosiedade sivíl, hodi halo debate no halo klarifikasaun kona-ba orsamentu setoriál sira ba tinan finanseiru 2020 nian.

Ida ne’e hotu tiha, sei prepara relatóriu no paresér ne’ebé sei debate iha Sesaun Plenária ba diskusaun kona-ba Proposta Lei OJE tinan 2020, ne’ebé sei hahú ho diskusaun no votasaun iha jeneralidade, iha loron 1 no 2 fulan-outubru. Diskusaun no votasaun iha espesialidade no votasaun finál globál sei hala’o husi loron 5 to’o loron 8 fulan-outubru. Redasaun finál sei haruka ba Prezidente Repúblika iha loron 9 fulan-outubru tinan 2020 ne’e.

Projetu Proposta Lei OJE ne’e ninia montante totál maka USD millaun 1,497, hodi kobre nesesidade sira husi programa no prioridade nasionál sira ne’ebé Governu Konstitusionál VIII define ona, liuliu iha nivel estabilizasaun setór sosiál no setór ekonómiku, no prosesu reforma institusionál nian sira ne’ebé la’o hela. Dokumentu ne’e mós inklui despeza sira ne’ebé iha relasaun ho resposta ba COVID-19 no ho medida sira ba rekuperasaun ekonómika. Proposta OJE ne’e hetan ona aprovasaun iha Sorumutuk Konsellu Ministrus nian iha loron 26 fulan-agostu tinan 2020 no submete ona ba Parlamentu Nasionál iha loron 15 fulan-setembru.

OJE tinan 2021 mós iha hela faze preparasaun, ne’ebé Governu sei entrega ba Parlamentu Nasionál iha loron 15 fulan-outubru mai ne’e.