DILI, 16 setembru 2020 (SRP) – Vise-Ministru Interior (VMI), António Armindo, nafatin alerta ba ema hotu ne’ebe halo movimentu ilegál iha liña fronteira terrestre Timor-Leste ho Indonézia tama mai teritoriu nasional atu koopera ho Ministeriu Saude kumpri kuarantena obrigatoriu.

Postu Fronteira Mota’ain-Batugade, Postu Fronteira Salele no Postu fronteira Sakato, durante ne’e mak hanesan portaun entrada legal ba ema no sasan ho dokumentu propriu tuir lei aduaneira no Migrasaun Timor-Leste nian, maibe realidade ne’ebe akontese durante fulan hirak nia laran ne’e, iha ema barak tenta hakat ba area Indonezia ho dalan ilegal mesmu propagasaun moras Coronavirus Disease (COVID-19) iha nasaun Indonézia sei iha hela.

“Husu ba sidadaun hotu ne’ebe oras ne’e iha hela sorin, atu tama mai teritoriu nasional Timor-Leste, obrigatoriamente tenke liu husi dalan legal, hodi kumpri regra ministeriu saude nian tama iha kuarantena obrigatoriu hodi prevene transmisaun surtu COVID-19 iha Timor-Leste, tanba propagasaun moras ne’e iha nasaun viziñu Indonézia maka’as tebes”, afirma Vise-Ministru António Armindo ba jornalista sira, hafoin remata enkontru Konsellu Ministru iha Palasiu Guvernu kuarta ne’e.

Governante ne’e hateten, atu evita ida ne’e Komandu PNTL mos koloka ona efetivus nomos estabelese ona medida forte no rigorozu atu labele admite ema liuhusi dalan illegal fronteira terrestre nian.

“Oras ne’e ita hasae ona numeru husi Unidade Polisia rua husi UPM ne’ebe halo kontrolu iha tasi nomos UEP ne’ebe fo mos apoiu ba UPF halao nafatin servisu hamutuk ho komunidade sira ne’ebe maka hela iha lina fronteira , F-FDTL, no Komandu Operasaun Espesial (COE-sigla portuges) no Komandu munisipiu Bobonaro, Cova-Lima no RAEOA, liu-liu autoridade ne’ebe iha fronteira atu bele hamutuk hodi minimija COVID-19 no tranzasaun ema tama no sai iha lina fronteira”, nia hateten

“Agora fila fali ba sidadaun hotu-hotu atu iha konsiensia, katak buat ida tama sai ilegal ne’e bele fo impaktu negativu ba seguransa nasional, sa tan iha situasaun ida estadu emerjensia hanesan propagasaun moras COVID-19 iha nasaun viziñu Indonézia bele lori moras husi sorin mai fali ita”. Tenik nia.