Governu Repúblika Populár Xina, liuhusi ninia Embaixadór iha Timor-Leste, Xiao Jianguo, oferese ona máskara protesaun nian hamutuk rihun 40 ba Ministériu Interiór, iha loron 27 fulan-agostu tinan 2020.

Máskara sira ne’ebé fó, bazeia ba kooperasaun bilaterál entre nasaun rua ne’e, atu apoiu serbisu PNTL nian, husi Unidade Patrullamentu Fronteira (UPF) no Servisu Migrasaun iha prevensaun COVID-19. Governu Xina mós fó tiha ona máskara rihun 30 ba PNTL, iha loron 26 fulan-juñu liubá.

Vise-Ministru Interiór, António Armindo, agradese ba doasaun husi Governu Xina, liuhusi ninia Embaixadór, “ne’ebé sei permite apoia país ne’e hodi luta hasoru pandemia globál ida-ne’e” no nia hateten katak ba nia “hanesan priviléjiu boot ida reprezenta Primeiru-Ministru, nu’udar Ministru Interiór, iha serimónia entrega ekipamentu médiku ida-ne’e husi Governu Repúblika Populár Xina ba Ministériu Interiór”.

Vise-Ministru ne’e dehan katak “máskara rihun 40 ne’e sei fahe ba membru UPF, membru Servisu Migrasaun no membru PNTL nian husi unidade sira seluk, ne’ebé hala’o knaar iha Aeroportu Internasionál Prezidente Nicolau Lobato, iha postu kontrolu fronteira rai-maran nian no postu integradu UPF nian sira.

Embaixadór Xiao Jianguo temi kona-ba “misaun importante Ministériu Interiór nian no serbisu boot ne’ebé Servisu Migrasaun no UPF hala’o iha prevensaun COVID-19 nian”.

Xiao Jianguo, haktuir katak “tanba risku boot iha Timor-Leste maihusi kazu importadu sira, funsionáriu migrasaun no polísia fronteira serbisu maka’as tebes iha prevensaun ba importasaun epidemia ne’e nian iha fronteira rai-maran sira” no hatutan tan katak “doasaun ida-ne’e halo atu nune’e pesoál liña frente nian bele proteje an di’ak liu.”

Diplomata ne’e reforsa disponibilidade Xina nian atu intensifika interkámbiu no kooperasaun entre Embaixada, Ministériu Interiór no Departamentu Imigrasaun nian, nune’e mós iha apoiu ba implementasaun planu Governu nian kona-ba rekuperasaun ekonómika no iha resposta ba efeitu COVID-19 nian ba ekonomia nasionál”.

Partisipa ona mós iha serimónia ne’e, Diretór-Jerál Servisu Migrasaun, Agostinho Gomes no Xefe Administrasaun Nasionál PNTL nian, Superintendente-Xefe, José Soares.