Governu, liuhusi Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo no Vise-Ministra Finansas, Sara Lobo Brites, entrega ona, ohin, loron 15 fulan-setembru tinan 2020, Proposta Lei Orsamentu Jerál Estadu nian (OJE) ba tinan 2020 ba Prezidente Parlamentu Nasionál, Aniceto Guterres.

Projetu Proposta Lei OJE tinan 2020 nian ne’e, hetan tiha ona aprovasaun husi Konsellu Ministrus iha loron 26 fulan-agostu liubá, ho montante totál dolar amerikanu millaun rihun 1,497, hodi kobre nesesidade programa no prioridade nasionál sira ne’ebé Governu Konstitusionál VIII define ona, liuliu iha nivel estabilizasaun setór sosiál no setór ekonómiku, prosesu reforma institusionál sira ne’ebé la’o hela, despeza sira kona-ba resposta ba COVID-19 no medida sira ba rekuperasaun ekonómika.

Komisaun Parlamentár Espesializada sira agora sei analiza Proposta Lei ne’e, ho prazu másimu fulan ida. Durante períodu ne’e, sei realiza audisaun ho membru Governu sira, dirijente sira husi administrasaun públika no reprezentante husi sosiedade sivíl. Tuirmai, Komisaun sira sei haruka sira-nia relatóriu setoriál sira ba Komisaun Ekonomia, Finansas no Anti Korrupsaun atubele elabora relatóriu no paresér kona-ba Proposta Lei OJE nian ne’e. Tuir fali mai sei halo aprezentasaun OJE iha Plenáriu atubele hetan apresiasaun iha jeneralidade (másimu loron tolu), iha espesialidade (másimu loron 10) no votasaun finál globál.

Preparasaun OJE tinan 2021 nian mós la’o hela, no Governu sei entrega ba Parlamentu Nasionál iha loron 15 fulan-outubru oinmai.