Governu Timor-Leste hato’o ninia kondolénsia ba “Renan Selak” nia mate
Prezidénsia Konsellu Ministrus
VIII Governu Konstitusionál
...........................................................................................................................
Loron 11 fulan-setembru tinan 2020
Komunikadu Imprensa
Governu Timor-Leste hato’o ninia kondolénsia tanba lakon “Renan Selak”
Ho tristeza no laran dodok tebes maka Governu Timor-Leste simu informasaun katak Faustino dos Santos “Renan Selak”, antigu kombatente Libertasaun Nasionál no Eis-Deputadu Parlamentu Nasionál, mate ona iha loron 10 fulan-setembru tinan 2020, iha Dili, ho idade tinan 63.
Faustino dos Santos “Renan Selak” moris iha loron 1 fulan-maiu tinan 1957, iha Aldeia Ira-Ara, Suku Fuiloro, Postu Administrativu Lospalos, Munisípiu Lautein. Nia luta durante tinan 24 ba Timor-Leste nia ukun rasik an no sai hanesan Sekretáriu Rejiaun I, Ponta Leste nian. Nia mós sai nu’udar Vise-Prezidente partidu UNDERTIM no membru Parlamentu Nasionál nian, durante lejizlatura daruak, tinan 2007 to’o tinan 2012.
Iha tinan 2017 simu nomeasaun hanesan Prezidente Konsellu Kombatentes Libertasaun Nasionál ba Munisípiu Lautein no iha fulan-janeiru tinan ida-ne’e, simu nomeasaun hanesan Vise-Prezidente Konsellu Kombatentes Libertasaun Nasionál, durante Kongresu Nasionál.
Iha tinan 2018 hetan kondekorasaun husi Prezidente Repúblika, Francisco Guterres Lú Olo, ho Medalla Orden Timor-Leste nian, hanesan rekoñesimentu ba méritu no kontribuisaun husi buat hirak ne’ebé nia halo ona ba povu timoroan no ba pátria ida-ne’e.
Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, hato’o sentida kondolénsia ba estimadu ‘Renan Selak” nia família no belun sira no hateten katak “ami lamenta ho ninia mate, maibé ami la haluha no fó onra ba ninia liman-rohan husi moris ida-ne’ebé nia dedika sein kondisaun ba pátria no ba povu timoroan”. REMATA
