Dili, Timor-Leste (Setembru 7, 2020) – Timor-Leste sei partisipa iha enkontru interfase virtual ho ofisiál senior sira husi Komunidade Sósio-Kultural ASEAN (ASCC) iha loron 8-10 Setembru 2020. Enkontru ne’e organiza husi Sekretariadu ASEAN no sei prezide husi Viet Name.

Haree ba situasaun atual saúde global nian, Komisaun Ofisiál Senior sira husi ASCC (SOCA) desidi atu organiza enkontru balun entre korpu setoriál sira ASCC nian ho Timor-Leste nia ministériu no ajénsia relevante sira liu-husi vídeokonferénsia.

Enkontru sira ne’e sai hanesan pasu importante ida ba Timor-Leste nia prosesu adezaun ba ASEAN. Timor-Leste no ASEAN durante ne’e fahe ona informasaun lubuk ida kona-ba oinsá Timor-Leste bele partisipa iha servisu sira ASCC nian, inklui kooperasaun iha área oi-oin hanesan desportu, direitu umanu, ambiente, edukasaun, saúde no seluk tan.

Enkontru virtual ne’e sei fornese plataforma ida hodi nune’e pontu fokál sira husi SOCA no korpu setoriál ASCC nian bele estabelese koneksaun no komunikasaun ne’ebé diak ho Timor-Leste nia ministériu no ajénsia relevante sira molok Misaun Exploratória hodi diskuti Timor-Leste nia resposta ba kestionáriu sira husi ASEAN.

Timor-Leste nia ministériu no instituisaun relevante sira ne’ebé sei partisipa iha enkontru virtual ne’e inklui Ministériu Solidaderiedade Sosiál no Inkluzaun; Ministériu Administrasaun Estatal; Ministériu Edukasaun, Juventude no Desportu; Ministériu Ensinu Superior, Siénsia no Kultura; Ministériu Saúde; Ministériu Agrikultura no Peska; Sekretaria Estadu Protesaun Sivíl; Sekretaria Estadu Formasaun Profisional no Empregu; Sekretaria Estadu ba Igualdade no Inkluzaun; Sekretaria Estadu Juventude no Desportu; Sekretaria Estadu Arte no Kultura; Sekretaria Estadu ba Komunikasaun Sosiál; Sekretaria Estadu Ambiente; Komisaun Funsaun Públika; Komisaun Nasional ba Direitu Labarik; no Ajénsia Teknolojia Informasaun no Komunikasaun. Reprezentante sira husi ministériu no ajénsia sira ne’e sei halibur hamutuk iha Institutu Ensinu Diplomátiku iha Ministériu Negosiu Estranjeiru no Kooperasaun (MNEK). Diresaun-Jeral ba Asuntu ASEAN iha MNEK mak sai hanesan Timor-Leste nia ajente koordenador.

Governu Timor-Leste nafatin iha komitmentu atu atinji prosesu adezaun ne’ebé diak, no sei kontinua atu haforsa koordenasaun ho ASEAN, hodi kontribui ba esforsu bo’ot liga ho preparasaun téknika.

Konkluzaun ba avaliasaun prontidaun téknika husi ASEAN iha 2020 sei loke dalan ba Timor-Leste nia adezaun iha tempu badak nia laran.