Governu, liuhusi Ministériu Finansas, prepara hela Proposta Lei kona-ba Orsamentu Jerál Estadu (OJE) ba tinan 2020 no tinan 2021 nian, atubele entrega ba Parlamentu Nasionál, iha loron 15 fulan-setembru no loron 15 fulan-outubru tinan ida-ne’e.

Projetu Proposta Lei OJE tinan 2020 nian, hetan ona aprovasaun horiseik, loron 26 fulan-agostu tinan 2020, iha sorumutuk Konsellu Ministrus nian, ho montante totál dolar amerikanu millaun 1,497, hodi kobre nesesidade sira husi programa no prioridade nasionál sira ne’ebé Governu Konstitusionál VIII define ona, liuliu iha nivel estabilizasaun setór sosiál no setór ekonómiku, prosesu reforma institusionál ne’ebé la’o hela, despeza hirak ne’ebé iha relasaun ho resposta ba COVID-19 no kona-ba medida sira atu rekupera ekonomia. Durante sorumutuk ne’e  analiza ona mós ajustamentu hirak ne’ebé presiza ba kalendáriu preparasaun OJE ba tinan 2020 no tinan 2021 nian, atu kumpre prazu sira ne’ebé hatuur ona.

Orsamentu Jerál Estadu ne’e ninia finansiamentu sei maihusi reseita doméstika sira, osan ne’ebé foti husi Fundu Mina-rai nian, saldu husi tezouru no empréstimu sira.

OJE ba tinan 2021 ne’ebé prepara hela ne’e, ninia objetivu mak atu rekupera no reforsa dezenvolvimentu, asente iha prioridade nasionál sira ne’ebé bazeia ba Programa Governu nian, Planu Estratéjiku Dezenvolvimentu Nasionál, Objetivu sira husi Dezenvolvimentu Sustentavel, Dezempeñu Polítika Fiskál, Impaktu COVID-19 nian no Planu Rekuperasaun Ekonómika, hodi define envelope fiskál ida ba tinan 2021 ne’ebé adekuadu ba nesesidade reál Nasaun nian.