Aniversáriu FALINTIL nian ba dala 45

Selebrasaun aniversáriu FALINTIL nian ba dala 45, ne’ebé organiza husi Ministériu Defeza, sei hala’o iha loron 19 no loron 20 fulan-agostu, ho tema “Ho espirítiu FALINTIL nian ha’u prontu no desididu atu serbí Povu no Nasaun nia interese sira”.

Iha loron 19, tuku 14:45, sei iha misa ida hodi fó omenajen ba Erói Nasionál sira iha Igreja Santu António Motael, tuir kedas ho tau ai-funan iha Jardín Eróis sira nian, iha Metinaru.

Iha loron 20, FALINTIL nia loron aniversáriu, serimónia militár iha kuartél-jenerál F-FDTL nian sei hahú iha tuku 8:00, no SE Prezidente Repúblika, Francisco Guterres Lú Olo, tuir previzaun, sei to’o iha ne’ebá iha tuku 9:30.

Hafoin onra militár, no integrasaun Estandarte Nasionál ba Forsa sira iha Parada, sei iha mós omenajen atu hanoin hikas fali Erói Nasionál sira ne’ebé mate iha funu-laran. Molok diskursu sira husi Xefe Estadu-Maiór-Jenerál F-FDTL, Majór-Jenerál Lere Anan Timur, no husi Prezidente Repúblika, sei halo anúnsiu ba promosaun militár sira.

Tuir fali ida-ne’e maka Forsa sira iha Parada sei halo desfile no tuir mai sei han meiudia nian no fahe malu.