Governadora, ne’ebé reprezenta Repúblika Demokrátika Timor-Leste, Vise-Ministra Finansas, Sara Lobo Brites, partisipa iha Sorumutuk Anuál da-5 Konsellu Governadór Banku Aziátiku nian ba Investimentu iha Infraestrutura sira (Asian Infrastructure Investment Bank, AIIB), iha loron 28 fulan-jullu tinan 2020, liuhusi videokonferénsia, husi Ministériu Finansas, iha Aitarak-Laran, Dili.

Aleinde Governadora nu’udar reprezentante Timor-Leste, Governadór sira husi mundu tomak hamutuk liuhusi meiu virtuál sira, ho dignatáriu sira AIIB nian, husi Pekín, iha Xina.

Sesaun importante sira iha sorumutuk ne’e maka diskursu maklokek nian husi Prezidente Repúblika Populár Xina, Xi Jinping, sesaun votasaun husi Governadór sira hotu atu hili Prezidente AIIB nian no aprezentasaun Relatóriu Anuál tinan 2019 nian.

Atuál prezidente AIIB nian, Jin Liqun, reeleitu ho votu unanimidade husi Konsellu Governadores nian ba mandatu daruak ba períodu tinan lima.

Timor-Leste sai membru Banku Aziátiku ba Investimentu nian iha Infraestrutura sira iha tinan 2017, tinan ida hafoin nia kriasaun banku ne’e nian iha tinan 2016, hanesan banku multilaterál ba dezenvolvimentu (MDB), ho membru hamutuk 82 iha kontinente hotu-hotu.

Adota valór fundamentál sustentavel no ekolójiku sira hanesan matadalan, AIIB ninia misaun maka promove dezenvolvimentu ekonómiku sustentavel, kria rikeza no hadi’a konetividade infraestrutura sira iha Ázia, investe iha infraestrutura no setór produtivu sira seluk, promove kooperasaun no parseria rejionál, aleinde serbisu hamutuk ho instituisaun sira seluk iha dezenvolvimentu multilaterál no bilaterál sira.

Kona-ba ida-ne’e, prioridade Banku nian haree liu ba infraestrutura sustentavel sira, ba infraestrutura transfronteirisa sira, ba mobilizasaun kapitál privadu, kobre projetu promosaun infraestrutura sustentavel no apoia nasaun sira ne’ebé buka hela atu alkansa meta ambientál no meta dezenvolvimentu nian.

AIIB finansia ona projetu 63 iha mundu tomak, ho valór dolar amerikanu millaun rihun 12, hahú husi nia kriasaun iha tinan lima liubá. Tinan ida-ne’e, AIIB aloka ona dolar amerikanu millaun rihun 10 iha ámbitu COVID-19, hodi fornese finansiamentu ba país sira hodi kombate impaktu husi pandemia ne’e iha saúde no iha nivel sosioekonómiku.

Timor-Leste daudaun ne’e la debe osan ruma husi AIIB, maibé, Ministériu Finansas sei buka dalan atu diskute ho AIIB kona-ba posibilidade finansiamentu ba projetu dezenvolvimentu nian sira iha Timor-Leste iha tempu besik nia laran.