Vise-Primeiru-Ministru, José Maria dos Reis, no Embaixadór Portugál nian iha Dili, José Pedro Machado Vieira, iha loron 28 fulan-jullu tinan 2020, inaugura Auditóriu “13 de março” iha Eskola Portugeza Dili – Sentru Ensinu Lian Portugés Ruy Cinatti.

Naran ne’ebé tau ba auditóriu ne’e fó hanoin hikas loron, iha ne’ebé mosu inundasaun boot  iha sidade Dili, ne’ebé estraga sasán barak iha fatin oioin iha sidade laran, afeta família 4500 resin no kauza mós estragu maka’as iha eskola ida-ne’e, hodi hamosu interrupsaun ba aula sira.

Governante ne’e, iha ninia diskursu, hateten katak “Governu VIII iha kompromisu atu elabora planu ordenamentu nian ida ba territóriu nasionál, atu nune’e, iha futuru dezastre ida hanesan ne’e bele iha impaktu ne’ebé ki’ik, la’ós de’it iha Dili, maibé mós iha fatin sira seluk iha Timor-Leste, ne’ebé afetadu husi inundasaun”.

José Maria dos Reis salienta “solidariedade no dedikasaun ne’ebé komunidade Eskola Portugeza Dili nian tomak hatudu ona, hahú husi profesór no funsionáriu, inan-aman no alunu sira”, “ne’ebé hatán ba akontesimentu iha loron ne’e” no “ne’ebé permite ita atubele hamutuk iha ne’e, hodi hanoin fali loron inundasaun nian ne’e hanesan dezafiu ne’ebé ita la hein, maibé ita konsege hakat liu”. 

Vise-Primeiru-Ministru ne’e hato’o “agradesimentu ida kle’an tebetebes” ba kompromisu kontínuu husi Eskola no Governu Portugés ba edukasaun iha Timor-Leste, ne’ebé dala ida tan hatudu liuhusi konstrusaun auditóriu ida-ne’e, ho kapasidade ba ema na’in 100.

José Maria dos Reis hateten mós katak “eskola ida-ne’e, dezde harii to’o oras ne’e, sai ona hanesan sentru formasaun boot ida, iha ne’ebé labarik timoroan barak aprende. Aleinde sai sai fatin prinsipál ba ensinu lian portugés nian, lian ida husi lian ofisiál rua Timor-Leste nian, sai mós hanesan reforsu ida ba ensinu kualidade nian ida ne’ebé prepara alunu sira bele kompete iha Timor-Leste laran no iha estranjeiru.

Governante ne’e ko’alia liután katak “Eskola Portugeza Dili harii iha tinan 2002, hanesan resposta ba nesesidade ne’ebé eziste iha Timor-Leste atu afirma timoroan sira-nia vontade hodi aprende lian portugés, lian ida husi ita-nia lian ofisiál sira” no fó hanoin mai ita liafuan husi “saudozu Prezidente Nicolau Lobato ”Ita hili lian Portugés hanesan Lian Nasionál Timor-Leste nian”, no hatutan katak “eskolla ida-ne’e sai fatór determinante ida ba Timor-Leste nia independénsia no soberania”.

Vise-Primeiru-Ministru taka ninia intervensaun, hodi fó hanoin hikas kona-ba “inimigu invizivel ho naran COVID-19”, ne’ebé maske, “ita laiha kazu ativu no tanba ne’e ita filafali ba normalidade iha nasaun laran”, “ ita tenke kuidadu nafatin no adapta an ho “normalidade foun” no ita presiza implementa duni ba ida ne’e”. Na’i-ulun ne’e tenik tan katak “Governu kontinua halo esforsu hotu-hotu ne’ebé presiza atu hamenus risku kontaminsaun foun sira, maibé presiza kolaborasaun husi instituisaun no ema hotu-hotu”, hodi apela “atu ita hotu, hamutuk kontinua serbisu hamutuk medida preventiva no kombate hasoru COVID-19 suseu nafatin, no nune’e bele garante ita-hotu-nia moris-di’ak”.