Sekretária Estadu ba Igualdade no Inkluzaun, Maria José da Fonseca Monteiro de Jesus, inaugura ona, iha loron 24 fulan-jullu tinan 2020, Programa “Inisiativa Spotlight ba eliminasaun violénsia hasoru feto no labarik feto sira” (“Spotlight Initiative to eliminate violence against women and girls”), iha Munisípiu Bobonaru.

Serimónia ne’e hala’o iha edifísiu Administrasaun munisípiu ida-ne’e nian, ho prezensa husi membru Governu sira, reprezentante sira husi Uniaun Europeia no Nasoins Unidas, autoridade munisipál no responsavel sira husi organizasaun sosiedade sivíl nian sira.

Inisiativa Spotlight ne’e, ne’ebé mai husi serbisu hamutuk entre Uniaun Europeia no Nasoins Unidas, ninia objetivu mak atu halakon forma violénsia nian hotu-hotu hasoru feto no labarik feto sira iha mundu tomak. Inisiativa ida-ne’e koloka tema violénsia hanesan foku husi esforsu globál sira ba igualdade jéneru no hakbiit feto sira. Programa ne’e implementa iha Timor-Leste ho asaun hamutuk ida entre Governu, Sosiedade Sivíl, Uniaun Europeia no Nasoins Unidas.

Eventu ne’e marka inísiu husi inaugurasaun inisiativa Spotlight nian iha Munisípiu sira, ne’ebé iha faze dahuluk, halo iha munisípiu tolu ne’ebé sai nu’udar prioridade, Bobonaru, Ermera no Vikeke. Tuir planu, inisiativa Spotlight ne’e sei lansa mós iha loron 6 fulan-agostu iha Ermera no iha loron 13 fulan-agostu iha Munisípiu Vikeke.

Programa ne’e prevee investimentu ida ho valór dolar amerikanu millaun 15, ba períodu tinan tolu nian, ho objetivu atu hametin estrutura no instituisaun jurídika sira país nian, promove norma sosiál pozitiva sira, aumenta asesu ba servisu apoiu nian ba sobrevivente sira violénsia nian, hadi’a rekolla no uzu dadus ba formulasaun ida di’ak liu ba polítika sira no hametin parseria sira ho organizasaun sira husi sosiedade sivíl.

Sekretária Estadu ne’e, durante lansamentu, hateten katak “responsabilidade atu, iha futuru, ita halakon violénsia iha ita-nia sosiedade, depende ba hotu-hotu nia haka’as an”.

Governante ne’e hateten tan katak “liuhusi lansamentu Inisiativa Spotlight nian, ita-nia komunidade bele tau hamutuk sira-nia hanoin no sira-nia esforsu hodi garante katak, ba oin, sei la iha tan violénsia no diskriminasaun iha ita-nia sosiedade, hasoru feto no labarik feto sira, maibé mós hasoru mane sira, ka ema sira ho defisiénsia, ka tanba ninia orientasaun seksuál.

Koordenadór Rezidente Nasoins Unidas nian, Roy Trivedy, hateten katak “igualdade jéneru sai nu’udar pre-kondisaun ida-ne’ebé nesesária hodi alkansa Objetivu sira husi Dezenvolvimentu Sustentavel. Inisiativa Spotlight ne’e signifika tulun movimentu nasionál nian ida iha Timor-Leste, liuhusi promosaun abordajen multisetoriál ida iha eliminasaun violénsia hasoru feto no labarik feto sira”.