Vise-Ministru Interiór, António Armindo, hala’o sorumutuk ho Ministru Prezidénsia Konsellu Ministrus, Fidelis Manuel Leite Magalhães, hodi hato’o ba nia kona-ba Planu Estratéjiku Polísia Nasionál Timor-Leste (PNTL) nian, husi Diresaun Jerál Protesaun Sivíl no Diresaun-Jerál Servisu Migrasaun nian.

Iha sorumutuk ne’e, António Armindo, aprezenta dokumentu ne’ebé trasa estratéjia, vizaun, misaun no objetivu sira ba área seguransa nasionál, ba Ministru Prezidénsia Konsellu Ministrus, ne’ebé nia misaun maka koordena preparasaun no organiza serbisu Governu nian, nune’e mós halo akompañamentu no avaliasaun ba ezekusaun husi desizaun hirak ne’ebé maka Konsellu Ministrus foti.

Planu Estratéjiku ida-ne’e nia objetivu mak atu kria kondisaun atu halo defeza ba direitu sidadaun sira-nian no ba prinsípiu hirak ne’ebé garante trankuilidade públika, pás no armonia ba povu Timor-Leste, ho perspetiva reforma no progresu nian ida, atu nune’e konsolida pás no estabilidade nasionál.