Ministru Prezidénsia Konsellu Ministrus, Fidelis Manuel Leite Magalhães, hala’o vizita serbisu nian ida ba Imprensa Nasionál Timor-Leste (INTL), iha loron 23 fulan-jullu tinan 2020.

INTL mak institutu públiku ida ne’ebé hala’o knaar atu hatán ba nesesidade hotu-hotu kona-ba produsaun gráfika ba entidade Estadu nian no mós ba entidade privada sira.

Iha vizita ne’e, responsavel INTL nian, Jaime Correia, sente kontente ho vizita dahuluk Ministru nian ba instalasaun INTL nian, hafoin simu pose nu’udar Ministru Prezidénsia Konsellu Ministrus.

Jaime Correia halo enkuadramentu istóriku badak ida kona-ba instituisaun ne’e, deskreve estrutura organizasaun nian no aprezenta rezultadu hirak ne’ebé alkansa ona no dezafiu sira ne’ebé INTL hasoru. Diretór ne’e mós lori Ministru ba vizita área produsaun nian no biblioteka gráfika estatál nian.

Ministru hateten ba Diretór katak vizita ida-ne’e hala’o iha ámbitu prosesu reorganizasaun serbisu Prezidénsia Konsellu Ministrus (PKM) nian, ne’ebé inklui INTL, atu rona preokupasaun imediata husi instituisaun ne’e ba ninia funsionamentu di’ak.

Ba ida-ne’e, Fidelis Magalhães orienta ona Diretór-Jerál PKM nian, atubele inklui iha Orsamentu Jerál Estadu nian ba tinan 2020 ka 2021, rekursu sira ne’ebé presiza ba transformasaun ida ne’ebé efetiva ba INTL atu sai duni Institutu Públiku.

Objetivu seluk husi vizita Governante ne’e nian, mak atu hadi’a jestaun interna no artikulasaun entre INTL ho instituisaun Estadu nian sira seluk, hanesan ho Gabinete Apoiu Jurídiku PKM nian, atu garante métodu sira verifikasaun no revizaun nian ba atu públiku sira, atu nune’e bele asegura kualidade husi diploma sira, ne’ebé publika iha Jornál Repúblika.

Fidelis Magalhães dezeja susesu no kontinuasaun serbisu di’ak ba ekipa INTL nian no hateten katak sei halo transformasaun graduál ida ba funsionamentu instituisaun ne’e nian, atu nune’e iha prazu médiu, INTL bele hasa’e ninia reseita no sai autosufisiente.

Harii iha tinan 1960, ho naran ‘’Imprensa Nasionál”, ninia misaun mak atu fó-sai atu ofisiál sira governu koloniál nian no prodús formuláriu ofisiál sira. Durante okupasaun indonézia, mantein atividade hanesan, ho naran “Badan Percetakan Nasional“.

Ho restaurasaun independénsia Repúblika Demokrátika Timor-Leste nian, hanaran fali “Gráfika Nasionál”. Iha tinan 2013, hahú prosesu transformasaun ida, ho aprovasaun ba ninia Planu Estratéjiku Reestruturasaun no Modernizasaun, atu nune’e bele halo transformasaun graduál atu sai empreza ida moderna no autosustentavel. Iha tinan 2016, prosesu ne’e lori nia tama ba merkadu nasionál, hodi hahú hala’o servisu produsaun gráfika nian, ba mós entidade privada sira. Iha tinan 2017, nakfilak an ba Institutu Públiku no muda ninia naran ne’ebé mak ohin loron ema hatene, “Imprensa Nasionál Timor-Leste”.