Diálogu Internasionál Díli nian, ho tema “ Harii paz no Harii Estadu”, hahú iha sexta-feira ida ne’e, iha Merkadu Munisipál timor nian, ho hahalok ida haka’as-an nian husi país no organizasaun hirak ne’ebé hola parte iha Diálogu ne’e.

Ministra Finansa, Emília Pires mak halo abertura servisu nian ne’ebé tuir kedas mai ho nota introdusaun ne’ebé aprezenta husi Prezidente nain rua eventu nian mak Ministru Planeamentu husi Repúblika Demokrátika Kongu, Olivier Kamitatu e Bella Bird, reprezentante husi Reinu Unidu. Tuir mai, Prezidente Repúblika Timor-Leste nian, José Ramos Horta hato’o nia diskursu kona-ba tema ne’ebé sira halo debate dadaun ne’e “Harii Paz no Harii Estadu” .

Hafoin sira hahú fahe esperiénsia ba malu ne’ebé lidera husi painél ida diskusaun nian ne’ebé kompostu husi reprezentante sira husi Timor-Leste, Libéria,Sudão Sul, Serra Leoa, Repúblika Demokrátika Kongu, Burundi, no Repúblika Sentru-Afrikana. Iha diskusaun ne’e sira identifika prioridade urgente sira no dezafiu hirak ne’ebé país hirak ne’e, nu’udar país hirak ne’ebé ladún metin, hasoru iha sira nia luta ba estabilidade no dezenvolvimentu.

Iha loron diálogu dauluk nia rohan, fó sai avizu ida katak sei kria fórum permanente ida ba “g7+”. Fórum ida ne’e nia objetivu mak atu hala’o nafatin servisu iha sorumutu “g7+” nian no prepara sorumutu tuir mai entre Estadu frágil (ladún metin) ho parseiru dezenvolvimentu sira iha tinan 2011, iha Seul.