Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ohin, loron 22 fulan-jullu tinan 2020, ho Diretór-Jerál Prezidénsia Konsellu Ministrus (PKM), Pedro Feno no ekipa atu debate ba preparasaun Planu Asaun Anuál no proposta orsamentál tinan 2020 nian.

Durante sorumutuk Diretór-Jerál PKM halo aprezentasaun ba Ministru kona-ba objetivu estratéjiku sira, dadus referente sira ba dezempeñu, rezultadu sira ne’ebé atinje ona no ezekusaun orsamentál tinan 2019 no semestre dahuluk tinan 2020, no mós kona-ba proposta orsamentál ne’ebé sei inklui iha Orsamentu Jerál Estadu ba tinan 2020.

Ministru ko’alia liu kona-ba pontu importante balun ne’ebé tenke tau iha proposta orsamentál sira tinan 2020 no tinan 2021 nian, iha nivel lojístiku no rekursu fíziku no umanu sira.

Aleinde proposta orsamentál ba tinan 2020, prepara mós orsamentu ba tinan 2021.

Tuir kalendáriu ne’ebé aprova ona husi Konsellu Ministrus, iha loron 29 fulan-juñu tinan 2020, Orsamentu Jerál Estadu nian sei aprova iha Konsellu Ministrus iha loron 26 fulan-agostu, no sei submete ba Parlamentu Nasionál iha loron 15 fulan-setembru. Kona-ba kalendáriu ba OJE tinan 2021, prevee katak apresiasaun ba Proposta Lei iha Konsellu Ministrus sei hala’o iha loron 25 fulan-setembru no bele submete ba Parlamentu Nasionál to’o loron 15 fulan-outubru.