Programa foun ida ba formasaun rekolla dadus hahú ona iha loron 14 fulan-jullu, liuhusi ‘Portál Munisipál’, ho objetivu atu hasa’e kompeténsia no kapasidade funsionáriu munisipál sira nian no atu apoia prosesu desentralizasaun administrativa.

Serimónia lansamentu programa ne’e hala’o iha munisípiu Ermera, no hetan partisipasaun husi Ministru Administrasaun Estatál, Miguel Pereira de Carvalho,  Embaixadór Uniaun Europeia iha Timor-Leste, Andrew Jacobs no responsavel ba Programa Nasoins Unidas nian ba Dezenvolvimentu (PNUD) iha Timor-Leste, Munkhtuya Altangerel.

Inisiativa ida-ne’e halo parte ba Projetu “Reforsa Dezenvolvimentu Lokál Integrál liuhusi Hasa’e  Kapasidade Autoridade Munisipál sira-nian iha Timor-Leste”, ne’ebé maka finansia husi Uniaun Europeia no PNUD, no ne’ebé implementa liuhusi kolaborasaun di’ak ida ho Ministériu Administrasaun Estatál, Parlamentu Nasionál, Institutu Nasionál Administrasaun Públika (INAP) no Autoridade Munisipál sira.

Asaun formasaun hirak-ne’e ninia objetivu mak atu hasa’e koñesimentu funsionáriu lokál sira-nian kona-ba ferramenta no indikadór dadus husi ‘Portál Munisipál’ no atu insentiva partisipasaun formandu sira nian. Sesaun sira-ne’e mós sei ajuda koordenasaun husi esforsu sira ba rekolla dadus entre servisu munisipál sira no Ministériu Administrasaun Estatál, liuhusi ‘Portál Munisipál’.

‘Portál munisipál’, ne’ebé lansa ona iha fulan-marsu liubá, maka plataforma interativa ida atu rejista no monitoriza prosesu kona-ba indikadór dezenvolvimentu iha nível munisipál. Portál Dadus Munisípiu nian ne’e rezultadu husi esforsu boot ne’ebé Ministériu Administrasaun Estatál halo hodi hametin dezenvolvimentu lokál. Plataforma ne’e bazeia ba indikadór dezenvolvimentu lubun boot ida ne’ebé sei permite atu halo análize no komparasaun dadus iha munisípiu hotu, hodi bele halo planeamentu ida ne’ebé di’ak liu no prestasaun servisu ida ne’ebé di’ak liu iha nível lokál.

Iha nia intervensaun, hodi loke eventu ne’e, Ministru Administrasaun Estatál afirma ona katak “Alvu prinsipál husi projetu boot ida-ne’e mak Autoridade Munisipál no funsionáriu públiku munisipál sira”.

Ministru hatete mós katak “la’ós de’it iha biban atu hatene utilidade husi ‘Portál Munisipál’ no ninia benefísiu sira, maibé tenke iha sentimentu pertensa ida no espíritu responsabilidade ida”.

“Kapasidade ida-ne’ebé mak estabelese iha buat hotu, hodi hatene, pratika, transmite no prezerva, atu nune’e buat hotu ne’ebé maka hetan ona labele lakon”, hatete Miguel Pereira de Carvalho.

Andrew Jacobs, manifesta ona “orgullu Uniaun Europeia nian hodi apoia prosesu desentralizasaun no dezenvolvimentu Munisípiu, liuhusi métodu sira ne’ebé efikás, partisipativu no inovadór, no ne’ebé mak implementa liuhusi koordenasaun di’ak ida ho Governu, PNUD no povu Timor-Leste.

Embaixadór Uniaun Europeia iha Timor-Leste hatete mós katak “presiza governasaun ida ne’ebé di’ak iha nível lokál atubele alkansa dezenvolvimentu ida ne’ebé sustentável no rezultadu sira ne’ebé ekuitativu. Formasaun ida-ne’e sei hadi’a inkluzaun sosiál no asesu husi sidadaun sira-nian ba servisu sira ne’ebé di’ak liu”.

Reprezentante PNUD nian hatete katak “asesu fidedignu ida ba dadus munisipais sei permite katak Governu sentrál no autoridade lokál sira bele promove polítika sira ne’ebé inkluziva no efikás” no hatutan tan katak “dezenvolvimentu tenke hala’o iha munisípiu sira, besik ho ema sira, no kapasitasaun ne’e mak ita-nia ferramenta ida ne’ebé di’ak liu atu alkansa dezenvolvimentu husi komunidade sira ne’ebé reziliente iha Timor-Leste”.

Asesu ba ‘Portál Munisipál’ iha www.portalmunicipal.gov.tl