Membru sira Governu Konstitusionál VIII nian hasoru-malu iha retiru, iha loro-kraik loron 15 fulan-jullu tinan 2020, iha auditóriu Ministériu Finansas.

Hafoin intervensaun abertura husi Primeiru-Ministru, Taur Matan Ruak, governante sira debate kestaun sira ne’ebé iha relasaun ho planeamentu, monitorizasaun, avaliasaun no orsamentasaun liuhusi programa sira, ba melloria kontínua ida husi kualidade kona-ba planeamentu no orsamentasaun, hodi alkansa ezekusaun ida despeza públika nian ne’ebé efisiente no efikás liután, tuir prioridade no programa sira Governu nian. Nune’e, governante sira hala’o mós diskusaun kona-ba prosesu no prosedimentu sira Sistema Nasionál Aprovizionamentu nian.

Membru sira Governu Konstitusionál VIII nian hala’o mós debate kona-ba sistema no instrumentu sira ba governasaun eletrónika nian (e-Government), ne’ebé ninia objetivu mak atu hakbesik sidadaun sira Administrasaun Públika nian, liuhusi dezenvolvimentu governasaun eletrónika no modernizasaun administrativa husi servisu públiku sira.

Ida ne’e mak ba daruak ne’ebé membru Governu sira hala’o sorumutuk iha retiru, hafoin estrutura Ezekutivu nian kompleta ona,  ho tomada pose ba membru Governu sira seluk, iha loron 24 fulan-juñu tinan 2020 liubá.

Retiru dahuluk hala’o mós iha auditóriu Ministériu Finansas nian, iha loron 26 no 27 fulan-juñu tinan 2020, ho objetivu atu hala’o debate ba prioridade sira ne’ebé sei implementa to’o tinan 2023  no ne’ebé tenke reflete iha Orsamentu Jerál Estadu nian.