Vise-Ministra Finansas, Sara Lobo Brites, partisipa ona, iha loron 10 fulan-juñu tinan 2020, iha serimónia lansamentu servisu online e-Request, ne’ebé hala’o iha Auditóriu Ministériu Finansas nian, iha Dili. Servisu ida-ne’e permite katak kontribuinte bele hetan asesu ba Sertidaun dívida nian, liuhusi internét, no la presiza ba to’o Ministériu Finansas.

Autoridade Tributária Timor-Leste (ATTL), Ministériu Finansas nian, dala ida tan marka momentu istóriku ida, tanba lansa servisu online e-Request, ne’ebé integra iha plataforma e-Services.

“Nu’udar Vise-Ministra Finansas, lansa servisu ida-ne’e hanesan priviléjiu ida, tanba lansamentu servisu ne’ebé haruka Sertidaun Dívida liuhusi e-Request ne’e, hanesan marku istóriku ida iha Reforma Fiskál nia leet, liuhusi ne’ebé Autoridade Tributária hala’o ona melloria kontínua ida ba ninia servisu sira. Hanesan ita hotu akompaña besik liu kona-ba ajenda Reforma Fiskál hahú iha Governu VI, ne’ebé mak alkansa ona mudansa ida-ne’ebé transformadora, liuhusi Diresaun-Jerál rua ne’e, Alfándega no Impostu sira sa’e nivel hodi transforma ba-iha Autoridade Aduaneira no ba Autoridade Tributária hirak ne’e rasik”, hatete Sara Lobo Brites. 

Governante ne’e hatete mós katak “objetivu atu realiza Reforma ba Diresaun rua ne’e mak iha hanoin katak rekolla reseita sira Estadu nian ne’ebé mak mai husi rekursus petrolíferus bele la dura tempu barak no, ninia efeitu mak loron ida rekursu ne’e sei maran. Tanba ne’e, reseita reziliente ne’ebé sei permite atu tulun ba sustentabilidade fiskál iha futuru ne’e maka reseita tributária doméstika, iha ne’ebé Estadu tau fiar ba iha Autoridade Tributária ba kobransa no jestaun impostu nian sira”.

Nafatin iha ámbitu Reforma no iha armonia no iha prestasaun servisu no dezempeñu ATTL nian, Vise-Ministra informa katak “implementasaun ba Reforma sira la’ós de’it atu fó podér nesesáriu ba ATTL atu kontinua hala’o nia knaar ka atu ATTL hetan de’it autonomia administrativa no finanseira. Objetivu uluknana’in nian maka atu harii instituisaun fidedigna ida, ne’ebé implika katak ATTL tenke hetan konfiansa no respeitu husi sidadaun tomak, liuliu husi kontribuinte sira.

ATTL tenke sai hanesan instituisaun ida ho reputasaun ne’ebé di’ak no tenke hadi’a di’ak liután ninia servisu ba kliente sira, hodi atua besik liu ba kontribuinte sira, ho forma ne’ebé efisiente no efikás liu iha kobransa impostu sira ba Estadu”.

Durante serimónia lansamentu e-Request nian, Diretora-Jerál AATL, Mónica Rangel da Cruz, hateten katak, “lansamentu e-Request ne’e marka momentu istóriku importante seluk ne’ebé alkansa ona husi ATTL, ne’ebé, importante liu mak atu fó apoiu ba ita-nia kontribuinte sira hodi evita prosedimentu administrativu hirak ne’ebé la nesesáriu no atu hamenus kustu kontribuinte sira nian ho prosesu ida ne’e. Liuhusi e-Request, kontribuinte sira la presiza dezloka ba eskritóriu ATTL hodi husu Sertidaun Dívidas. Sira bele husu iha ne’ebé de’it no bainhira de’it, bainhira sira iha ligasaun ho rede “internét”.

Diretora-Jerál ne’e hatutan mós katak, bainhira kontribuinte sira hato’o pedidu ba emisaun Sertidaun Dívidas, kontribuinte sira automatikamente sei simu avizu ida ne’ebé sistema mak jere, hodi informa katak ninia pedidu daudaun ne’e prosesa hela. Karik laiha problema pendente ne’ebé rejista iha SIGTAS no buat hotu ne’ebé tuir lei, kontribuinte sira sei hetan emisaun ba ninia Sertidaun Dívidas iha prazu loron ida to’o loron rua.

Servisu e-Request halo parte husi plataforma e-Services ne’ebé, ofisialmente lansa ona iha loron 4 fulan-outubru tinan 2019, husi Vise-Ministra Finansas no husi Diresaun-Jerál Autoridade Tributária (DJTA). Plataforma e-Services ne’e, husi kedas  ninia lansamentu iha tinan kotuk, fó ona benefísiu ba kontribuinte rihun rua liu, ne’ebé hala’o sira-nia servisu ho forma ‘online’ liuhusi e-Filling no e-Reporting. ATTL Ministériu Finansas nian hakarak kontinua atu dezenvolve plataforma e-Services hodi introdús Sistema e-Payment iha tempu badak.