Governu Timor-Leste, liuhusi Ministru Finansas, Fernando Hanjam, ohin, loron 13 fulan-jullu tinan 2020, asina ona akordu ida ho Banku Aziátiku Dezenvolvimentu (ADB, Asian Development Bank) ba dezenvolvimentu projetu ida atu hadi’a meius subsisténsia ba produtór setór agroflorestál no kafé nian sira. Serimónia asinatura akordu ne’e hala’o iha Auditóriu Ministériu Finansas, iha Díli.

Akordu ne’e prevee subvensaun ida ho valór dolar amerikanu millaun tolu hodi apoia uma-kain rihun rua ne’ebé prodús kafé, liuhusi formasaun ba prátika agríkola ne’ebé di’ak no asesu ba finansiamentu. Projetu ne’e ho objetivu atu hadi’a kualidade kafé no ligasaun entre produtór sira no merkadu, iha rai laran no iha rai li’ur, atu hasa’e meius subsisténsia ba produtór sira.

Projetu ne’e sei implementa durante tinan haat oinmai, no sei lidera diretamente husi Ministériu Agrikultura no Peskas, ho apoiu husi Asosiasaun Kafé Timor-Leste (AKTL), hodi kontribui atu alkansa meta sira Governu nian, ne’ebé estabelese iha Planu Nasionál Dezenvolvimentu Setór Kafé nian ba tinan 2019-2023, ne’ebé lansa tiha ona iha tinan kotuk. Tuir planu ne’e, Governu sei investe dolar amerikanu millaun 38 iha área prinsipál neen, maka hanesan: peskiza no dezenvolvimentu, produsaun no produtividade, kualidade no hasa’e valór, asesu ba merkadu, konsumu doméstiku no turizmu, no koordenasaun jestaun setór nian.

Projetu ne’e hetan mós apoiu husi Japaun, liuhusi Fundu Japonés ba Redusaun Pobreza nian no foka liu iha munisípiu sira ne’ebé prodús kafé, hanesan: Aileu, Ainaru, Bobonaru, Ermera, Likisá no Manufahi. Projetu ne’e ninia objetivu mak atu duplika produsaun agroflorestál no kafé nasionál, no loke dalan hodi hasa’e 270% iha reseita esportasaun kafé to’o tinan 2030. Sei tulun mós Governu hodi hametin jestaun informasaun, koordenasaun setór nian no fahe koñesimentu.

Kafé nu’udár produtu naun-petrolíferu ne’ebé Timor-Leste esporta liu, ho uma-kain timoroan besik 37,5% ne’ebé kuda kafé, no maizumenus balun husi uma-kain sira ne’e depende ba produtu ne’e hodi hetan rendimentu.

Aleinde Ministériu Finansas, partisipa mós iha serimónia ne’e Ministru Agrikultura no Peskas, Pedro dos Reis, Vise-Ministra Finansas, Sara Lobo Brites, Embaixadór Japaun iha Timor-Leste, Kinefuchi Masami no Diretór Rezidente ADB iha Timor-Leste, Sunil Mitra, ne’ebé partisipa liuhusi videokonferénsia.