Primeiru-Ministru no Ministru Interior, Taur Matan Ruak, tersa-feira ne’e, loron 30 fulan-juñu tinan 2020, simu transferénsia serbisu hosi nia ómologu sesante, Filomeno da Paixão de Jesus, liuhosi serimónia transferénsia ne’ebé mak hala’o iha Ministériu Interior Vila Verde, Dili.

Iha intervensaun hafoin simu tiha transferénsia poder, Primeiru-Ministru no Ministru Interior, hateten, ne’e hanesan priviléjiu hodi lidera Ministériu Interior, ministériu ne’ebé mais importante ba vida nasaun nian, aleinde Ministériu Defeza, tanba Ministériu rua ne’e mak iha instituisaun hodi tau matan ba seguransa no defeza nasaun nian ne’ebé asegura estabilidade, soberania no integridade teritorial.

“Ha’u kontente loos serbisu ho ita boot sira, subtitui Sr. Ministru Defeza tau matan ba instituisaun ida ne’e, serbisu hamutuk ho Sr. Vise, Sr. Sekretáriu Estadu, Sr. Komandante PNTL, Sr. Diretór Imigrasaun, Sr. Diretór Jeral, Diretór Nasionál sira. Ita-boot sira hatene ha’u-nia background militar, muito ezijente ba ha’u-nia an, mas ha’u ezijente ba ema seluk. Iha vida militar iha buat rua ke ba ami sagradu liuliu espíritu de hierarkia, segundu mak dixiplina. Serbisu to’o iha nia tempu, étika uja rekursu estadu nian ho rasionalidade. Ne’e importante loos, tanba ne’e ha’u fiar katak ita sei serbisu hamutuk, klaru ke hanesan Primeiru-Ministru haree país tomak”, dehan Primeiru Ministru no Ministru Interior iha intervensaun.

Aproveita biban refere, Primeiru-Ministru no Ministru Interior mós agradese tebes ba Ministru Defeza ba nia empeñamentu hanesan Interinu iha Ministériu Interior durante tinan rua, no promete sei kontinua serbisu hirak ne’ebé Ministru sesante la konsege halo hotu no husik hela.

“Ha’u hakarak lori ita-boot sira-nia naran no ha’u-nia naran rasik, Sr. Vise Ministru, Sr. Komandante Jeral PNTL, Sr. Sekretáriu Estadu Protesaun Sivíl no ita boot sira hotu agradese ba Sr. Ministru Defeza ba serbisu hotu ne’ebé halo iha tempu liubá, ne’ebé ezerse papel hanesan Ministru Interior Interinu iha Ministériu ida ne’e. hanesan Sr. Ministru dehan, halo buat hotu mas ida ne’e mak halo bele ajuda sira ne’ebé tuir bele hatutan ho hanoin dalan mesak aumenta nosaun dixiplina, nosaun de hierarkia nosaun sentimentu partensa, domin (…) Sr. Ministru obrigadu barak ba serbisu ida ne’e, konta ho ha’u-nia apoiu nafatin iha Defeza”, tenik nia.

Xefe Governu mós hein katak sei hetan kontribuisaun di’ak hosi parte sira iha Ministériu Interior nian hosi serbisu hamutuk para presta serbisu ida di’ak liu ba bem-estar nasaun nian, no nu’udar Primeiru-Ministru no Ministru Interior sei aranja tempu hasoru malu beibeik, apesar serbisu mais operasionál sei entrega ba Vise Ministru, Antonio Armindo atu tau matan.

Ikusliu, Primeiru-Ministru no Ministru Interior mós kompromete sei buka rezolve difikuldades iha PNTL nia laran hodi buka rezolve atu Instituisaun PNTL bele avansa ba oin, aleinde husu ba Imigrasaun atu kontrola di’ak movimentasaun sidadaun estranjeiru ne’ebé tama iha teritóriu laran.

Hola parte iha serimónia transferénsia ne’e mak hanesan, Sekretáriu Estadu Protesaun Sivíl Joaquim José Gusmão dos Reis Martins, Komandante Jeral PNTL, Komisáriu Polísia, Faustino da Costa,  no kargu xefia sira  iha Ministériu Interior no Sekretária Estadu Protesaun Sivíl nian.