Governu Timor-Leste

Audiénsia ho membru Governu no Komisaun C, D no F Parlamentu Nasionál nian hala’o ona iha loron 16 no 17 fulan-juñu, atu halo apresiasaun inisiál ba Proposta Lei nú. 17/V (2^a), kona-ba realizasaun transferénsia estraordinária daruak husi fundu mina-rai iha tinan finanseiru 2020, no kona-ba alterasaun dahuluk ba Lei nú. 2/2020, loron 6 fulan-abríl, kona-ba autorizasaun hodi realiza transferénsia estraordinária husi fundu mina-rai.

Projetu Proposta Lei ne’e nian Governu maka submete ona ba Parlamentu Nasionál iha loron 10 fulan-juñu, ho pedidu ba ajendamentu no tramitasaun prosesu lejizlativu nian ho karakter prioridade no urjénsia.

Proposta Lei ne’e ninia objetivu mak atu autoriza realizasaun transferénsia estraordinária ida husi Fundu Mina-rai ba Orsamentu Jerál Estadu, ho valór dolar amerikanu 286.800.000, hodi garante kondisaun finanseira nian sira ne’ebé sufisiente ba funsionamentu baibain Administrasaun Públika nian to’o aprovasaun Orsamentu Jerál Estadu tinan 2020, ho konsiderasaun katak reseita ne’ebé mai husi reseita fiskál, no saldo ezekusaun orsamentál tinan kotuk nian, hamutuk ho transferénsia estraordinária Fundu Mina-rai nian, ne’ebé autoriza husi Lei nú. 2/2020, loron 6 fulan-abríl, la sufisiente hodi finansia atividade regulár Administrasaun Públika nian aleinde fulan agostu, no ho konsiderasaun katak montante ne’ebé atribui ona ba orsamentu Fundu COVID-19 la to’o ba despeza tomak ne’ebé prevee ona ho medida prevensaun no kombate ba pandemia COVID-19.

Komisaun C, ne’ebé trata asuntu Finansas Públikas, Komisaun D, ne’ebé trata asuntu Ekonomia no Dezenvolvimentu, no Komisaun F, ne’ebé trata asuntu Saúde, Seguransa Sosiál no Igualdade Jéneru, hala’o audisaun hamutuk ida, iha loron 16 fulan-juñu, ho Ministru Finansas, Fernando Hanjam, Vise-Ministra Finansas, Sara Lobo Brites, Ministra Saúde, Odete Maria Freitas Belo, Governadór Banku Sentrál Timor-Leste, Abrão de Vasconcelos, no mós ho responsavel ba Konsellu Jestaun Fundu COVID-19.

Iha loron 17 fulan-juñu, Vise-Ministra Solidariedade Sosiál no Inkluzaun, Signi Chandrawati Verdial, no Ministru Prezidénsia Konsellu Ministrus no Ministru Koordenadór Asuntus Ekonómikus, Fidelis Manuel Leite Magalhães, mos hasoru malu ho membru Parlamentu Nasionál.

Durante audiénsia sira, membru Governu hatán ba dúvida no sujestaun deputadu sira nian, no aprezenta rezultadu ezekusaun Fundu COVID-19 no implementasaun husi medida estabilizasaun ekonómika sira, ne’ebé presiza hodi rezolve impaktu negativu COVID-19 nian iha ekonomia nasionál.

Komisaun C sei hakerek relatóriu no paresér kona-ba Proposta Lei ne’e nian. Iha loron 22 fulan-juñu, Parlamentu Nasionál sei hala’o debate no votasaun iha jeneralidade, iha espesialidade no votasaun finál globál, no, iha loron 23 fulan-juñu, redasaun finál sei haruka ba Prezidente Repúblika.