Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk, ohin, loron 15 fulan-juñu tinan 2020, ho Embaixadora Estadus Unidus Amérika (EUA) nian iha Timor-Leste, Kathleen Fitzpatrick.

Partisipa mós iha sorumutuk ne’e maka Vise-Xefe Misaun Embaixada EUA nian iha Timor-Leste, Elias Parra, Diretora Peace Corps nian, Kavita Pullapilly no Diretór área polítika no ekonómika embaixada Amérika nian, Tye Sundlee.

Durante enkontru ne’e, sira ko’alia kona-ba programa oioin husi kooperasaun amerikana iha Timor-Leste ne’ebé oras ne’e la’o hela, apoiu EUA nian ba luta hasoru COVID-19 no asuntu bilaterál seluk ne’ebé sei pendente hela.

Diplomata ne’e fó parabéns ba Ministru, tanba funsaun foun ne’ebé nia ezerse, no afirma hikas fali kompromisu EUA atu fó apoiu kontínuu ba dezenvolvimentu Timor-Leste nian.

Ministru Prezidénsia Konsellu Ministrus halo enkuadramentu kona-ba orgánika foun Governu nian, liuliu, iha nivel alterasaun ne’ebé afeta diretamente ba programa sira kooperasaun amerikana, hanesan programa Millenium Challenge Corporation, ne’ebé mak asina iha fulan-maiu tinan 2019 no ne’ebé koordena uluk husi Ministériu Reforma Lejizlativa no Asuntus Parlamentares.